Матч КХЛ вачыма беларускага арбітра: паглядзеў паўтор з тэлефона, прызнаў, што па-за плэй-оф судзiць iнакш, змянiў вымову гульцу на рэспект

У сезоне КХЛ-2023/24 рэгулярна публiкуюць агляды матчаў вачамi арбiтраў – з камер на iх шлемах i не толькi. 22 марта выклалi чарговы – з трэцяга матча серыi першага раўнда плэй-оф КХЛ паміж «Лакаматывам» i «Авангардам» (за які гуляе беларускi форвард Iгар Мартынаў). Адным з суддзяў той сустрэчы быў Максім Сідарэнка з Беларусi – i ён выдаў своеасаблiвы перформанс.

У аглядзе ўсё пачынаецца з працэсу падрыхтоўкі суддзяў. Сідарэнка карыстаў пiсталет – масажны. Агрэгатам арбiтр расслабляў «зацэментаваную» заднюю паверхню сцягна, жартуючы, што «сёння на пярэдняй».

Таксама беларускі спецыяліст падзяліўся пацешнай гісторыяй пра (ужо былога – яго звольнiлi проста падчас серыi) трэнера «Авангарда» Міхаіла Краўца. Калiсьцi Сідарэнка пад’ехаў удакладніць у коўча, ці будзе змена, той сказаў, што не, але на лёд паехалі новыя абаронцы – на здзiўленне Сідарэнкi Кравец патлумачыў, што адказвае толькi за нападаючых.

Падчас першага перыяду свежага матча Сідарэнка выдаваў шмат забаўных каментароў. А падчас перапынку калега прапанаваў пераглядзець адзін са спрэчных момантаў проста на тэлефоне – Сiдарэнка пагадзiўся. Удваiх арбiтры вырашылi надаць асаблiвую ўвагу паводзiнам аднаго з гульцоў.

У другім перыядзе Сiдарэнка не адрэагаваў на адзін са спорных эпізодаў. Пасля ў размове з калегам беларускi арбiтр патлумачыў, што да аднолькавых эпiзодаў падыходзiць па-рознаму ў залежнасцi ад часткi сезона: маўляў, у «рэгулярцы» даў бы дзве хвiлiны за блакiроўку, а «цяпер гэта такое сабе выдаленне».

Таксама гледачы маглі ўбачыць, як беларускі арбітр адчытаў форварда «Лакаматыва» Сцяпана Нікуліна: «Нешта мне не падабаецца, як ты сябе сёння паводзіш! Любы дотык – і ты на пятай кропцы. Там скачаш, тут на азадак упаў. Давай больш уважліва!».

Пасля Сiдарэнка казаў сам сабе, што Нікулін перастаў падаць. А ў адной з наступных паўз прыехаў да гульца, каб услед за вымовай сказаць iншыя словы: «Ну я ацаніў там, ты прыгажун, выстаяў. Я думаў, зараз павалішся. Малайчына, паважаю! Як дамаўляліся».

Арбiтр таксама пацешна пачакаў выезду на лёд машыны для яго залiўкi, успомнiўшы адзiн з базавых прынцыпаў дарожнага руху: «Перашкода справа – прапускаем».

У адной з паўз да Сiдарэнкi прыехаў гулец «Авангарда» Багдан Кiсялевiч i запытаўся, чаму ў аднолькавых, з яго пункту гледжання, момантах арбiтр самога Кiсялевiча папярэджвае словамi пра «жоўтую картку», а яго крыўдзiцелю не кажа нiчога. Сiдарэнка адказаў хутка i проста: «Ты хулiган!».

Асноўны час скончыўся 1:1, i беларускi арбiтр скардзiўся, што яны з калегамi «дабаўбаталiся да авертайма». А пасля яшчэ адзiн хакеiст «Авангарда» Уладзiмiр Ткачоў сказаў Сiдарэнку, што той замiнае гуляць у кутах пляцоўкi, i параiў «чытаць гульню». Суддзя нават не стаў спрачацца: «Дамовiлiся. Усё для цябе!».

Ужо на трэцяй хвiлiне дадатковага часу «Авангард» аформiў перамогу, а ў раздзявальнi Сiдарэнка сказаў, што гэта «найлепшы авертайм». Поўнае вiдэа можна паглядзець нiжэй – асаблiва раiм момант, як беларускi арбiтр фiлiгранна адскокваў ад шайбы, пасля дадаўшы, што «ледзь не развалiўся» (адзнака 18:27).

Гледачам відэа спадабалася, i некаторыя асобна выдзялялi менавiта перформанс Сідарэнкі.

Хаця былі і тыя, каму не спадабалася праца рэферы. Сiдарэнку ўспомнiлi i фразу пра плэй-оф.

Беларускі арбітр Максім Сідарэнка працуе ў КХЛ ужо амаль дзесяцiгоддзе. Яго дэбютным матчам стала сустрэча паміж ЦСКА і рыжскім «Дынама», якая прайшла 9 верасня 2015 года. Усяго ж ён адпрацаваў у гэтай лізе больш за пяцьсот матчаў.

Сідарэнка трымае шайбу са свайго 500-га матча

Арбітр неаднаразова атрымліваў траўмы падчас сваёй працы. У адным з інтэрвʼю для прэс-службы КХЛ ён узгадваў, як у адным з фіналаў чэмпіянату Беларусі гулец неакуратна перанёс клюшку і трапіў Сідарэнка па твары. Арбiтр нават не змог спынiць гульню – не меў фiзiчнай магчымасцi свіснуць з-за сурʼёзнай траўмы скiвiцы, з якой лiлася кроў. З арэны Сiдарэнку павязлi ў лякарню, матч дапрацоўваў рэзервовы арбітр.

У 2019-м на ЧС у Браціславе ён надарваў прыводную цягліцу ў апошнім матчы групавога этапу ды не змог папрацаваць у плэй-оф. Тады стаяла i пытанне, ці здолее ён аднавіцца да сезона, але ў выніку паспеў.