Трэнер зборнай Казахстана: «З радасцю згуляем з Расіяй, калі нашы федэрацыі дамовяцца»
Галоўны трэнер зборнай Казахстана Магамед Адзіеў сказаў, што хацеў бы правесці таварыскую гульню са зборнай Расіі.
«Я ведаю, што нашыя федэрацыі футбола кантактавалі наконт матчу, але не сышліся ў датах. Але маладзёжныя і юнацкія зборныя гулялі. У гэтым плане ёсць кантакт, чаму б у будучыні не згуляць, гэта магчыма.
У наступным годзе ў нас дзесяць гульняў, у сакавіку пачынаецца адборачны цыкл да Еўра-2024, і на люты мы шукаем спарынг-партнёра. Калі дамовяцца нашыя федэрацыі, чаму б не. З радасцю згуляем», – сказаў Адзіеў.
Магамед Адзіеў – расійскі спецыяліст, які трэніруе зборную Казахстана з 2022 года. Раней стала вядома, што Расія правядзе спарынг з Таджыкістанам.
Нагадаем, што ФІФА і УЕФА адхілілі ўсе расійскія каманды ад спаборніцтваў пад сваёй эгідай у адказ на вайну, якая з 24 лютага працягваецца Расіяй ва Украіне з выкарыстаннем тэрыторыі Беларусі.