Дзмітрый Гушчанка: «Тактыка ў нас была наогул прыкладна адна і тая ж. Але гэта працавала»

Брамнік «Віцебска» Дзмітрый Гушчанка распавёў пра працу трэнера каманды Аляксандра Паўлава.

«Ён вучыцца гэтаму рамяству. Усё ж такі гэта яго першы па-сапраўднаму самастойны вопыт. Не моцна эмацыйны трэнер. Стараецца спакойна падаваць інфармацыю камандзе. Памятаю, я чытаў аўтабіяграфію Карла Анчалоці – «Ціхае лідарства». Яе назва адсылае да таго, што італьянец ніколі не павышае голас, але пры гэтым яго заўсёды добра чуваць. Яго бязмерна паважаюць і беспярэчна выконваюць яго патрабаванні і заданні. Вядома, маштабы розныя і трэнеры не супастаўныя. Але вось гэтым Паўлаў нагадвае мне Анчалоці. Не разносіць распранальню, асабліва не крычыць. Кажа спакойна – і проста хоча, каб усё гэта выконвалася. Няма запалохванняў тыпу «я цябе знішчу, звольню» і гэтак далей.

Тактыка ў нас была наогул прыкладна адна і тая ж. Але гэта працавала. Калі спрошчана – хуткі пераклад мяча ад сваіх варот да чужых. І зноў-такі, Першая ліга – не вышэйшая: тут нам давядзецца быць больш выдасканаленымі. Таму што – іншы супраціў, іншыя гульцы і каманды. Іх трэба будзе чымсьці здзіўляць», – сказаў Гушчанка.