Ілля Чарняк: «Галоўнае, каб «Дынама» перамагала, і хацелася б як мага далей прасунуцца у еўракубках»
Футбаліст мінскага «Дынама» Ілля Чарняк распавёў пра свае чаканні ад гульні за свой новы клуб.
– Барацьба за трапленне ў стартавы склад чакаецца неабыякая.
– Ніколі не баяўся канкурэнцыі, якая, вядома, з'яўляецца рухавіком прагрэсу. Трэба выкладвацца на сто адсоткаў на трэніроўках і выкарыстоўваць свае шанцы ў матчах.
– З кім з цяперашніх партнёраў быў знаёмы раней?
– З Сяргеем Паліцевічам, Ромам Бегуновым, Сашам Сачыўкам, Сашам Сялявам перасякаліся ў «Шахцёры». Абаранялі колеры моладзевай зборнай краіны разам з Андрэем Рылачом, Мікітам Дземчанкам, Федзем Лапавухавым. Займаліся ў адной трэнажорнай зале з Максам Швяцовым. Ды і ўвогуле беларускі футбольны свет невялікі – плюс-мінус усе адзін аднаго ведаюць.
– Гэта значыць адаптацыя ў новым калектыве не зацягнецца?
– Перакананы, што праблем не ўзнікне.
– Якія персанальныя арыенціры ставіш перад сабой?
– Не люблю дзяліцца асабістымі планамі. Галоўнае, каб каманда перамагала. Ну і хацелася б як мага далей прасунуцца у еўракубках.
– Паспяховы выступ за «бела-сініх» здольны адчыніць дзверы ў зборную Беларусі.
– Было б нядрэнна. Прадстаўляць родную краіну – і прыемна, і прэстыжна. Плюс дадатковы шанец заявіць пра сябе ў міжнародных матчах, – распавёў Чарняк.