Жонка Кудзіна пра яго выхад на волю: «Замерз, згаладнеў, я яго кармлю, паю, грэю»
Жонка беларускага байца ММА Аляксея Кудзіна, які выйшаў на волю 28 снежня, Таццяна Пархімовіч, выклала ў Іnstagram гісторыю, дзе расказала пра самаадчуванне мужа і падзякавала неабыякавых людзей за словы падтрымкі.
– Усім прывітанне. Складана думаць, таму што я вельмі мала спала апошнія гэтыя два дні. Галава была напоўнена рознымі думкамі. І ўсё паспяхова скончылася. Я забрала Лёшу. Ён замерз увесь, згаладнеў, я яго кармлю, паю, грэю. Ён усім усё адкажа. Ён у свой дырэкт нават не зойдзе сёння, таму што ён проста адпачывае.
Я накрыла на стол. Чакаю сяброў, гасцей, якія захочуць убачыць яго, пагаварыць з ім, проста пагутарыць. Цяпер проста сяду, вып'ю віна і буду адпачываць, таму што я вельмі моцна стамілася. Усім велізарная падзяка за цёплыя словы – гэта вельмі прыемна, – напісала Пархімовіч.
Нагадаем, Кудзін 10 жніўня 2020 года падчас акцыі пратэсту ў Маладзечне ў ліку іншых бяззбройных людзей быў атакаваны групай сілавікоў, якія распылілі газ і нанеслі шматлікія ўдары дубінкамі. Кудзін у адказ ударыў некалькіх сілавікоў. Байца затрымалі пазней у той жа дзень, кінуўшы пад колы яго машыны гранату, у яго тройчы стрэлілі з траўматычнага пісталета і збілі. Неўзабаве Кудзіну прад'явілі абвінавачанні па ч. 2 арт. 363 КК РБ (супраціўленне супрацоўніку міліцыі ці іншай асобе, якая ахоўвае грамадскі парадак, звязанае з ужываннем гвалту або пагрозай яго прымянення), аднак праз некалькі дзён адпусцілі пад хатні арышт.
19 лістапада 2020-га Кудзін не з'явіўся на судовае паседжанне па сваёй справе, пакінуўшы краіну, і быў абвешчаны ў вышук. У пачатку 2021-га Кудзіна затрымалі ў Расіі, дзе ён знаходзіўся ў следчым ізалятары да 21 ліпеня. У той дзень Еўрапейскі суд па правах чалавека забараніў экстрадыцыю спартсмена ў Беларусь, аднак Кудзіна вывезлі ў Мінск, дзе таксама змясцілі за краты. 11 жніўня яго прыгаварылі да 2,5 года пазбаўлення волі.
