Арына Сабаленка: «Пасля US Open марыла аб рэваншы з Гауф»
Беларуская тэнісістка Арына Сабаленка падзялілася чаканнямі ад матчу з Коры Гауф.
Спартсменкі 25 студзеня згуляюць у паўфінале Australian Open.
У асабістых сустрэчах амерыканка вядзе 4:2. Апошні раз Сабаленка і Гауф гулялі на US Open-2023. Беларуская тэнісістка прайграла (6:2, 3:6, 2:6).
– Вы сустрэнецеся з Гауф на другім ТВШ запар. Ці рады вы згуляць з ёй пасля таго фіналу на US Open?
– Так, я рада. Пасля US Open марыла аб рэваншы. Гэта будзе добры матч. Мы з Кока заўсёды ваюем. Таму я рада сустрэчы з ёй і з нецярпеннем чакаю паўфіналу.
– Гауф зараз у выдатнай форме. Чаму так цяжка гуляць супраць яе?
– Яна выдатна рухаецца і вяртае кожны твой удар. Так што часам трэба выбудоўваць розыгрыш па некалькі разоў, каб знайсці месца для лёгкага завяршальнага ўдару.
Яна вельмі складаны супернік. Гауф выдатны гулец. Я вельмі чакаю нашу сустрэчу, – сказала Сабаленка.
