Прызёр ЧБ Адамовіч пра Ціманоўскую: «Казалі, што яна дурніца, што павінна была маўчаць і трываць»
Прызёр чэмпіянату Беларусі ў бегу на 10 тысяч метраў Раман Адамовіч, які пакінуў Беларусь і пераехаў у Польшчу, расказаў у інтэрв'ю Telegram-каналу «О, спорт! Ты – мир!» пра тое, як у РЦАПе па лёгкай атлетыцы ставяцца да беларускай спартсменкі Крысціны Ціманоўскай.
– Якая атмасфера наогул пануе ў лёгкай атлетыцы Беларусі?
– Нават не ведаю, як дакладна апісаць. Такая напружаная атмасфера... Часта атлеты абураюцца, чаму аднаго адправілі на зборы, а іншага – не. Маўляў, я майстар спорту міжнароднага класа, А ён, КМС, раней мяне атрымаў касцюм. Ці яго адправілі на спаборніцтвы, а мяне – не. Пастаянна нейкія таркі, недастатковае разуменне, ніякай шчырасці. А ёсць яшчэ старэйшыя трэнеры, якія набіраюць групы са сваіх любімчыкаў, са сваіх выхаванцаў, і ім, вядома, больш прывілеяў. Гэта таксама ўплывае на агульную атмасферу ў камандзе.
А яшчэ вельмі здзівіўся, як усе ставіліся да Крысціны Ціманоўскай у жніўні 2021 года, калі яна трапіла ў скандал на Алімпіядзе. Я тады ў РЦАП перасякаўся са шматлікім атлетамі, і неяк у лазні пачуў: «Вось яна такая дрэнная, смецце з хаты выносіць. Навошта гэта трэба было рабіць?» Пры гэтым людзі нават не разумелі, чаму Ціманоўская вырашыла так паступіць. Казалі, што яна дурніца, што павінна была маўчаць і трываць. А корань праблемы ніхто не разумеў. Нават нягледзячы на тое, што ў СМІ ўжо трапілі аўдыязапісы таго, як на Ціманоўскую ціснулі, як ёй пагражалі – усё роўна людзі былі не на баку спартсменкі. Мяне, шчыра кажучы, такое паводзіны здзівіла. Магчыма, проста трапіў тады ў кампанію ябацек. Добра, калі б у іх нешта асабістае было, але, наколькі ведаю, нічога такога. Напэўна, людзям рэальна галоўнае проста сядзець ціха, маўчаць і не высоўвацца. І гэта былі дзеючыя спартсмены, не толькі бегуны. Прычым даволі вядомыя, якія на топ-спаборніцтвы ездзяць, на Алімпіяды. Адзін з іх, як памятаю, сказаў літаральна наступнае: «яна гэта зрабіла дзеля таго, каб хайпануць. Моладзь цяпер такая – робіць усё дзеля хайпа»»
– А былі тыя, хто падтрымліваў Ціманоўскую?
– Такіх, хто прама сказаў бы, што падтрымлівае яе, я не сустракаў. Чаму? Шчыра, нават не разумею, – сказаў Адамовіч.
⚽️ Чэмпіянат свету-2022 па-беларуску і без VPN! Пампуй дадатак Tribuna.com
