Крысціна Ціманоўская: «Беларускія спартсмены на Алімпіядзе мяне не цікавілі»
27-гадовая беларуская лёгкаатлетка з польскім пашпартам Крысціна Ціманоўская ў інтэрв'ю парталу «Зеркало» падзялілася меркаваннем пра паездку на Алімпіяду-2024.
– Бачылі нешта ў Парыжы, акрамя спаборніцтваў?
– Не, толькі вёску і стадыён. Наведвала Дом Nike на тэрыторыі вёскі, таму што я амбасадор брэнда. У Доме можна было смачна паесці, зрабіць манікюр, масаж, скарыстацца паслугамі візажыста, прыйсці на фізіятэрапію – мне вельмі спадабалася.
А так нікуды не хадзіла. Вольнага часу амаль не было: ці старты, ці аднаўленне і падрыхтоўка. Перад вяртаннем у Польшчу выпаў вольны дзень, але засталася ў вёсцы. У мяне былі інтэрв'ю з буйнымі выданнямі, сустракалася са знаёмымі з іншых зборных.
Дадам, што раней прыязджала ў Парыж як турыстка, бачыла асноўныя славутасці. Таму не было парыву зноў паехаць глядзець на тую ж Эйфелеву вежу.
– Перасякаліся ў алімпійскай вёсцы з беларускімі спартсменамі?
– Не. Ні з кім не збіралася вітацца, мець зносіны і сябраваць. Мяне ўвогуле не цікавіла гэтая зборная і гэтыя спартоўцы, – сказала Ціманоўская.
