Ціманоўская – пра свайго экс-мужа: «Дзіўна, што ў Польшчы ніхто не заняўся фактам супрацоўніцтва нашага грамадзяніна з КДБ Беларусі»
Беларуская лёгкаатлетка з польскім пашпартам Крысціна Ціманоўская заявіла, што яе экс-муж Арсень Зданевіч супрацоўнічае з КДБ пасля вяртання ў Беларусь.
– Праблема з мужам мяне наогул не турбавала. Быў судовы разбор, і там усё вырашылася. Мы рассталіся пасля чэмпіянату міру ў Будапешце, і пасля некалькіх месяцаў шлюбаразводнага працэсу было вынесенае рашэнне суда.
Адзіная праблема заключалася ў тым, што ён скраў у мяне шмат грошай і пакінуў краіну. Але я больш нічога не магу з гэтым зрабіць.
– У вашага мужа таксама было польскае грамадзянства?
– Так. Ён атрымаў яго па маёй просьбе. Я напісала прэзідэнту Польшчы, што хачу прадстаўляць Польшчу і хацела бы змяніць грамадзянства.
Я згадала там, што ў мяне ёсць муж і што я хацела б, каб ён таксама застаўся ў Польшчы, бо ён мая апора. Я вельмі хацела, каб ён таксама атрымаў грамадзянства.
І ён яго атрымаў. Аднак цяпер ён пражывае ў Беларусі і супрацоўнічае з мясцовым КДБ. Цяпер ён там заяўляе, што ніколі не хацеў польскага грамадзянства і што яно яму ўвогуле не патрэбнае.
Для мяне дзіўна, што ў Польшчы ніхто не заняўся фактам супрацоўніцтва нашага грамадзяніна з КДБ, – сказала Ціманоўская.
