«У нашай сітуацыі ты б здох ад страху». Што за ўкраінцы адказалі на «тролінг» Недасекава пра святло і газ
Адзін у Беларусі быў бы ў топе.
У 2021-м рэжымнік Максім Недасекаў узяў бронзавы медаль на АГ у скачках у вышыню і пагражаў узяць золата ў 2024-м. Але траўмы аказаліся супраць – за 3,5 года пасля Токіа Недасекаў вельмi шмат лячыўся, а апошні раз выходзіў у сектар у студзені 2024-га. Свае медальныя алімпійскія намеры лукашыст перанёс на 2028-ы – але верыцца з цяжкасцю.
Пакуль што скакун спрабуе сябе ў музыцы – у жніўні нават выступіў з DJ-сэтам на феставалі ў Віцебскай вобласці – і перыядычна нагадвае пра сябе ў дзяржмедыя і сацсетках. У самым канцы 2024-га Недасекаў наведаў выставу, дзе была асветленая беларуская энергетыка, і ў сваім Instagram падпісаў відэа адтуль: «У нас ёсць святло і газ, а ў вас?» – дадаўшы ў канцы дужку-ўсмешку.
Такое пасланне выглядала ці то бязглузда, ці то агідна. Бязглузда – калі так Недасекаў паспрабаваў уліцца ў чарговы рэжымны «флэшмоб»: у яго межах спрабуюць здымаць відэа з намёкам на тое, што ў Беларусі газ танны, а на захад – дарагі. Так, гэта наступствы абмежаванняў паставак з Расіі ў адказ на вайну ва Украіне – рэжым жа за зніжкі на газ ва ўсім падтрымлівае краіну-агрэсара, у тым ліку дае тэрыторыю для атак. Мярзотна – калі Недасекаў так паспрабаваў закрануць украінцаў, якія сапраўды перыядычна пазбаўляюцца электрычнасці і газу з-за ракетных удараў Расіі па аб’ектах інфраструктуры. За гэтую версію кажа тое, што скакун і раней быў заўважаны ў спробах «затроліць» Украіну за тое, што яна змагаецца за сваю незалежнасць, адмовіўшыся «мірна» стаць часткай Расіі.
Неўзабаве Недасекаў сам апублікаваў рэакцыю двух украінскіх лёгкаатлетаў, якія ўсё ж такі прынялі ягоны выпад на свой рахунак. Антон Нагарняк нагадаў Недасекаву пра міжнародны бан, а Дыяна Мірашнічэнка назвала беларускага скакуна «нізкім чалавекам», якi б ва Украiне ўжо «здох ад страху», на што той паспрабаваў аджартавацца, а ў цэлым яшчэ раз пакпiў з праблем, якiя спансуе блiзкi яму лукашэнкаўскi рэжым.
19-гадовы Нагарняк і 18-гадовая Мірашнічэнка – пара ў стасунках. А яшчэ абодва сапраўды выступаюць на міжнародных спаборніцтвах – пакуль што на моладзевым узроўні. У жніўнi 2024 года ў складзе зборнай Украіны яны ездзілі на чэмпіянат свету па лёгкай атлетыцы U-20 у Перу. Там Нагарняк стаў 13-м у скачках у даўжыню – да квалiфiкацыi ў фiнал з 12 найлепшых не хапіла двух сантыметраў. Мірашнічэнка ж у той жа дысцыплiне заняла чацвёртае вынiковае месца. Пры гэтым у скачках яна стала спаборнiчаць толькi ў мiнулым годзе – да гэтага спецыялiзавалася толькi на бегу. На ЧС U-20 удзельнiчала таксама ў эстафеце 4х100 метраў, дзе з калегамi стала шостай.
На ўкраiнскiм узроўнi абодва з пары ўжо майстры спорта ды маюць поспехi па дарослых: у 2024-м дзяўчына выйграла чэмпiянат Украiны у эстафеце, а хлопец стаў другiм у скачках ў даўжыню (увогуле ён пакуль спрабуе сябе ў шэрагу дысцыплiн з дзесяцiборства, у тым лiку ў скачках у вышыню).
Мяркуючы па выніках 2024-га, з юніёрамі ўзроўню Нагарняка ў Беларусі складана. На чэмпіянаце Украіны ён паляцеў на 7,72 метра, а на іншых унутраных спаборніцтвах – увогуле на 7,78. На ўсіх беларускіх скакуноў за год ёсць толькі адзін лепшы вынiк – 7,84 ад 29-гадовага Мікіты Лапаценкі. Бліжэйшы з катэгорыі U-20 – Дзяніс Уракаў з 7,66 пры прыкметным спадарожным ветры. Мірашнічэнка на ЧС U-20 скокнула на 6,22 – такі ж найлепшы вынік у Беларусі з гэтай узроставай катэгорыі ў старэйшай на 1,5 года Анастасіі Дрозд, далей ляцелі толькі значна больш вопытныя спартсменкі.
Іншыя пасты карыстальніка
