Экс-баскетбалістка «Гарызонта» ўкраінка Уро-Ніле: «Пасля пачатку вайны гульцы той каманды пісалі: «Прабач, мы супраць вайны! Мы не выбіралі Лукашэнку, не галасавалі за яго»
Украінская баскетбаліста Мірыям Уро-Ніле, якая ў сезоне-2015/16 выступала за мінскі «Гарызонт», у интерв'ю «Зеркалу» распавяла, што ёй беларускія баскетбалісткі выказвалі ёй падтрымку пасля таго, як 24 лютага Расія ўварвалася на тэрыторыю Украіны з выкарыстаннем тэрыторыі Беларусі, а таксама сказала, што не разумее маўчання спартоўцаў з гэтай нагоды.
– Ад беларусак была падтрымка пасля пачатку вайны?
– Так. Гульцы, персанал той каманды пісалі: «Маша, прабач, мы не жадалі, каб так здарылася! Мы супраць вайны! Ты ж ведаеш, што мы не выбіралі Лукашэнку, не галасавалі за яго». Яны казалі, што ўкраінцы для беларусаў як родныя. Вядома, я верыла ў іх шчырасць.
– Пісала і Трафімава, якая хадзіла на мерапрыемствы з удзелам Лукашэнкі?
– Не. З іншага боку, прыемная падтрымка Украіне ад Каці Сныцінай, Лены Леўчанкі. Яны не баяцца выказвацца, хаця з-за сваёй пазіцыі не могуць вярнуцца дадому.
– Вы разумееце беларускіх спартоўцаў, якія маўчаць падчас вайны?
– Не. Мне кажуць, маўляў, мы баімся, нас могуць пасадзіць. Але якая альтэрнатыва? Маўчаць? Ад гэтага нікому не добра. Нікому! Думаць, што можна адсядзецца, а потым выбраць пераможцу – горш за ўсё. Яшчэ не разумею тых, хто ездзіць сёння на спаборніцтвы ў Расію. Хапае і беларускіх баскетбалістаў, якія гуляюць за расійскія клубы. Мусіць, добра тамака зарабляюць – амерыканцы і еўрапейцы бо шматлікія з'ехалі. Калі ты супраць вайны, але пры гэтым атрымліваеш грошы ад краіны-агрэсара, гэта проста двудушнасць. І жудасна па-чалавечы! Пагарджаю такімі людзьмі.
– Нашы функцыянеры і атлеты любяць паўтараць: спартсмены ні ў чым не вінаватыя, спорт павінен быць вольны ад палітыкі.
– Я не згодна. Сёння палітыка ва ўсіх сферах. У кожнай краіне ёсць свабода слова. Прынамсі, павінна быць. Няхай у Беларусі нельга нешта рабіць гэтак жа адкрыта, як ва Украіне, але можна напісаць у сваіх сацсетках, выказаць пазіцыю. Хоць бы адзін пост – усё пачынаецца з маленькіх дэталяў. Кожны чалавек любіць спорт. Ён прачытае словы свайго куміра, на якога падпісаны, задумаецца, вывучыць інфармацыю. Сацсеткі – велізарная сіла! А разважаць, маўляў, я выкажуся, але гэта ні на што не паўплывае… паспрабуй для пачатку! Хтосьці падумае, што мне лягчэй заклікаць да дзеянняў, бо Украіну бамбуюць. Аднак я нікому не пажадаю перажыць падобную сітуацыю. Нават ворагам, якіх у мяне няма, – сказала Уро-Ніле.