Трэнер «Мінска» Сухавецкі пасля матча з «Астаной»: «У гэтых даганялках нам не хапіла часу»

Асістэнт галоўнага трэнера «Мінска» Аляксей Сухавецкі падзяліўся меркаваннем аб матчы з «Астаной» (82:86).

– Гульня атрымалася няроўная: то ўверх, то ўніз. Кожная з каманд у розных чвэрцях выйгравала з вялікім лікам.

Мусіць, гэта звязана з недаканцэнтрацыяй. Калі адна каманда выдатна забівае, другая ў гэты час крыху прасядае. І ў наступнай чвэрці сітуацыя мяняецца наадварот.

У гэтых даганялках нам не хапіла, на жаль, часу. «Астана» добра атакавала здалёку, была агрэсіўная на шчытах.

Але за кошт таго, што яны зрабілі больш страт, мы трымаліся і ў нас быў шанец перамагчы, – лічыць Сухавецкі.

Нагадаем, галоўны трэнер каманды Расціслаў Вяргун прапусціў матч па стане здароўя.