Рэжымніца з БФБ чакае агрэсіі да беларусаў пры разбане, у які не верыць – а ў сумным ЧБ вінаваціць колькасць жыхароў краіны (не ведаючы, колькі каманд)
Расхваліла баскетбол 3х3, дзе ў зборнай яе сын.
Беларускі баскетбол апошнім часам прыцягвае да сябе ўвагу бясконцымі паразамі «Мінска» ў расійскай лізе ВТБ. Новую нагоду звярнуць на яго ўвагу дала рэжымніца Анастасія Марыніна – генеральны сакратар беларускай федэрацыі, якая абвінавачвала Украіну ў развязанай Расіяй пры беларускім садзейнічанні вайне.
Марыніна прыйшла на 17-хвіліннае інтэрв'ю на дзяржТБ – да працаўніцы прапаганды Юліі Сіліпіцкай, вядомай сваёй непісьменнасцю і своеасаблівымі рэакцыямі на фразы гасцей. На гэты раз, калі Марыніна хваліла баскетбалістаў словамі «прыгажуны» і «разумніцы», Сіліпіцкая раптам заявіла: «А вы, Анастасія, мастак у літаральным сэнсе слова».
Зрэшты, сама Марыніна таксама выдавала тыя яшчэ перлы. Пачала з таго, што галоўнай падзеяй 2023 года, сказаўшы, што «заўсёды захапляецца ў першую чаргу нашымі спартсменамі», назвала Гульні краін СНД, назваўшы іх «добрым прадуктам». А падрыхтоўку да спаборніцтваў баскетбалісты, якія «насамрэч жылі на арэне», нібыта ўвогуле пачалі яшчэ ў 2019-м, хоць тады яшчэ не прайшлі нават першыя такія «гульні» (яны адбыліся ў 2021-м у Расіі). Ну а ў 2023-м быў такі вялікі ўзровень канкурэнцыі, што ад Беларусі ў баскетболе выставілі чатыры каманды – і «другія» зборныя ўзялі дзве бронзы. А яшчэ гэта былі спаборніцтвы ў фармаце 3х3 і сярод гульцоў 2003 года нараджэння і маладзейшых. Вось бы ў 2019-м здзівіліся, калі б даведаліся, што такі турнір будзе лічыцца «галоўным»!
На баскетбол 3х3 рэжымнікі ўвогуле відавочна робяць стаўку – а базавую для зборнай мужчынскую каманду наогул адаслалі пад крыло рэжымнага ж гіганта «Беларуськалія» ў Салігорск. Новым «Шахцёрам» стаў былы «Мінск» – клуб, асноўная каманда якога ўсім прайграе ў класічны баскетбол у расійскай лізе ВТБ. Ад гэтага Марыніна дае два рэцэпты – або «павялічыць бюджэт у два разы», або заявіць каманду ў іншы турнір, але таксама абавязкова расійскі. Але захопленыя водгукі пра баскетбол 3х3 занялі ў генсака значна больш часу – яна назвала яго «проста трэндам», прывёўшы ў якасці аргументу адкрыццi «дваровых пляцовак» (якіх неяк не відаць за межамі Мінска) і тым, што нібыта «ў футбол адзін не пагуляеш», а ў баскетболе можна сябе на «дзве гадзіны заняць», ды яшчэ і «адцягнуцца ад камп'ютарнай залежнасці». Адкажам на гэты паток свядомасці адным простым фактам, які, здаецца, лепш тлумачыць такую цікавасць Марынінай да 3х3: у новым «Шахцёры» гуляе яе сын Ян.
Ян Марынін крайні справа
У Салігорск нават паклікалі замежных трэнераў – як патлумачыла Марыніна, нібыта таму, што «нашы трэнеры не гатовыя цалкам засяродзіцца толькі на 3х3». Цяпер сына генсака трэніруе расіянін Уладзімір Агабаб'ян, які прывёў зборную сваёй краіны да срэбра АГ-2020. Але Марыніну, якая для чагосьцi «рэгулярна ездзіць на трэніроўкі», больш уразіў расійскі трэнер па АФП, былы кідальнік дыска Яўген Бурын – таму што ў яго «тоны дыпломаў па павышэнні кваліфікацыі».
Мэта зборнай Беларусі на аснове «Шахцёра» – расійскія «Гульні БРІКС» і «Гульні сяброўства». На больш крутыя турніры Марыніна нават не настройваецца – кажа, «было б вельмі наіўна думаць пра тое, што нас дапусцяць і мы заўтра кудысьці паедзем». Зрэшты, нават без міжнароднага бана генеральны сакратар не ў захапленні: маўляў, візы атрымаць «нерэальна», а кошт авіябілетаў праз Стамбул «касмічная» (хаця хто перашкодзіў бы запазычыць аўтобусны досвед футбольнага «Нёмана», якому і візы неяк далi). Але «самае галоўнае пытанне» для Марынінай – гэта бяспека: жанчына верыць, што беларускую каманду на міжнароднай арэне чакаюць «агрэсія, правакацыя, выпады», а арганізатары могуць аказацца не гатовыя іх «выключыць».
Зрэшты, больш за ўсё здзівілі развагі Марынінай пра чэмпіянат Беларусі – калі да гэтага яе развагі толькі папахвалі прыхарошваннямі, то тут дайшло да фактычных памылак. Відавочна жадаючы сябе пахваліць, функцыянерка заявіла, што ў 2017-м, калі яна з'явілася ў БФБ, «палова каманд мелі статус аматарскіх, гэта былі такія мужчыны з піўнымі жыватамі, і мы ледзь збіралі пяць клубаў». Вось толькі ў сезоне-2016/17 мужчынскі ЧБ налічваў дзевяць каманд, у 2017/18 – дзесяць.
Ну а сёння, паводле слоў Марынінай, у Беларусі «11 мужчынскіх каманд у двух дывізіёнах – наймацнейшым і маладзёжным». Вось толькі пры складанні ўсіх асноў і фармаў цяперашняга ЧБ калектываў атрымліваецца не 11, а 13. Тая ж праблема з жаночымі камандамі: для Марынінай іх дзевяць, а ў табліцы ЧБ – 10. Прычым калі наяўнасць дывізіёнаў у мужчын функцыянер патлумачыла тым, што «пройгрышы у 80 ачкоў складаныя для псіхікі 16-гадовага гульца», то жаночаму ЧБ такое абяцана толькі ў наступным годзе – што юныя дзяўчыны будуць аналагічна пакутаваць у гэтым, для БФБ аказалася невідавочна.
Але нічога рабіць з ЧБ, у якім за межамі пары-тройкі наймацнейшых клубаў баскетбалістам даводзіцца фактычна гуляць за ежу, Марыніна не хоча. Прычына? Ну гэта проста фантастыка – генсак вінаваціць ва ўсім ніяк не сябе, а, увага, малое для яе насельніцтва Беларусі!
«Найацнейшыя гульцы з'язджаюць у расійскія клубы, але гэта плюс – там іншы ўзровень, добрая практыка. Наша задача – рыхтаваць гульцоў зборнай, і зразумела, што калі 10 мільёнаў насельніцтва, то мы не зробім там супер-пупер шоу з чэмпіянату Беларусі, гэты прадукт з вялікім укладаннем грошай не будзе запатрабаваны. Чэмпіянат – гэта падрыхтоўка маладых гульцоў», – заявіла Марыніна.
На 1 студзеня 2023-га ў Беларусі жыло ўсяго 9,2 мільёна чалавек, але сутнасць трызнення выказвання Марынінай не ў гэтым. А хаця б у тым, што па суседстве з Беларуссю знаходзіцца Літва з насельніцтвам менш за тры мільёны жыхароў – дзе нават на радавыя гульні чэмпіянату краіны прыходзіць і чатырохзначная колькасць чалавек, а ўжо на плэй-оф арэны трашчаць па швах.
Напрыканцы Марыніна выдала топ-фразу: «Мы ўжо зазірнулі ў 2024 год і, як заўсёды, спалохаліся». Усё з-за таго, што ў федэрацыі нібыта «літаральна кожны дзень ідзе каля 20 турніраў» (хоць, як мы зразумелі, з колькасцю ў Марынінай бываюць праблемы). Далей рушыў бадзёры расповед пра спаборніцтвы у Беларусі, Расіі і Кыргызстане – апошнія функцыянер вылучыла як «асабліва цікавыя», бо там будуць яшчэ Узбекістан і Таджыкістан.
