Чынуша ляпнула пра жаль тых, з кiм не гуляе беларуская зборная – але не падобна, што iм ёсць пра што шкадаваць
Чарговыя баскетбол-фантазii.
Беларускi баскетбол ужо дзесяць гадоў узначальвае адданы «высокi» чыноўнiк Лукашэнкi Максiм Рыжанкоў.
Яго блiжэйшая памагатая ў вiдзе – генеральны сакратар і па сумяшчальніцтве і выканаўчы дырэктар беларускай федэрацыі Анастасія Марыніна, крыважэрнасць якой шакавала нават яе сяброў.
Яшчэ Марынiна час ад часу выступае з заявамi, якiя папросту не адпавядаюць рэчаіснасці. Напрыклад, чыноўніца блытала колькасць удзельнікаў чэмпiянату Беларусi i перабольшвала насельнiцтва нашай краiны, на якое спрабавала перакласцi няздольнасць БФБ зрабiць з матчаў шоу.
Днямі Марынiна выступiла ў чарговы раз – i выдала новую порцыю бязглуздзiцы, цяпер пра зборную Беларусi.
«Канешне, хацелася б паспаборнічаць з моцнымі суперніцамі. Вось у нас як бы не было год такой практыкі. Але пагулялі добрыя спарынгі са зборнай Расіі. У прынцыпе, наша каманда па выніках Еўрабаскета 2021 года – мы занялі чацвёртае месца, але ўзровень не ўпаў, а за кошт, я думаю, маладых спартсменак ён яшчэ і павысіўся. Таму няхай шкадуюць тыя, у каго з намі няма магчымасці згуляць», – загнула рэжымнiца.
Калi пад словамi «такая практыка» Марынiна разумела ўсё ж матчы з «моцнымi супернiцамi», то нi з якiмi зборнымi, акрамя расiйскай, беларуская каманда не гуляе нашмат больш за год – з лістапада 2021-га, калі ў адборы на ЧЕ-2023 абгулялі Чэхію і Нідэрланды. У лютым 2022-га каманда магла згуляць ў Японіi ў кваліфікацыi да ЧС-2022, аднак гульцы падхапілі COVID-19 – праз гэта паездку адмянілі. А неўзабаве Расiя пачала вайну ва Украiне з выкарыстаннем тэрыторыi Беларусi, адказам на што стаў мiжнародны бан.
А з чаго б шкадаваць усiм тым, хто ў гэты перыяд не гуляе з Беларуссю? Што за такiя «маладыя спартсменкi», па версii Марынiнай, павышалi ўзровень каманды? Паспрабуем зразумець па самых свежых матчах зборнай – у лютым, калi Беларусь гуляла супраць Расii як асноўным (перамагла 73:70), так i моладзевым (тут была параза 60:83) складамi.
У першым беларускiм складзе самымі маладымі гульцамі сталі 23-гадовыя Яна Яхнавец з «Гарызонта», якая так i не выйшла на паркет, і Дарына Бачкарова з «Мінска», якая за 11,5 хвiлiны набрала два пункты. У клубным сязоне-2023/24 Бачкарова набiрала 11,6 ачка, 4,8 падбора і 3,5 перадачы за сярэднiя амаль 20 хвілін за матч, а Яхнавец набірала 8,5 ачка, 2,6 падбора і 4,3 перадачы ў сярэднім за 18 хвілін.
Яшчэ адным навiчком зборнай аказалася 25-гадовая Наталля Гарбачова з маскоўскага «Дынама». У матчы супраць Расіі за 13,5 хвiлiны яна набрала 7 ачкоў і 2 падборы. У сваёй маскоўскай камандзе адзначалася 9,8 ачка, 3,4 падбора і 2, 6 асіста – але «Дынама» па вынiках ЧР аказалася на апошнiм радку.
Вопыт гульні за «першых нумароў» зборнай атрымала і 24-гадовая Кацярына Карпук. У гэтым сезоне за «Мінск» статыстыка ў дзяўчыны была такая: 16,8 ачка, 5,5 падбора і 2,7 асіста. А супраць Расii трэнерка Наталля Трафімава выдзяліла баскетбалiстцы менш за дзве хвіліны на паркеце, за якія спартсменка набрала два балы.
У моладзевым складзе зборнай Карпук таксама была i стала самай вынiковай – 11 балаў за амаль 24 хвiлiны. А вось другой па вынiковасцi аказалася сапраўды юная баскетбалiстка – 17-гадовая Марʼя Бойка набрала 10 ачкоў за 17 з невялiкiм хвiлiн. У клубным сезоне за МБА-2 у расiйскiм Д2 Бойка набірала 6,7 ачка 5,6 падбора.
Хто яшчэ сярод маладых гульцоў засвяцiўся пры паразе ад Расii? Напрыклад, 20-гадовая цэнтравая Яна Макуца – як быццам пераемнiца Анастасii Верамеенка. Выступаючы за «Мінск», Макуца ў сярэднім набірала 11,5 ачка і 8,9 падбора за 23 хвіліны матча. Супраць расiянак за 22,5 хвiлiны – 4 ачка і 9 падбораў. Яе равесніца Марыя Ляскоўская набрала 4 ачкі за 13,5 хвіліны ў тым спарынгу, а ў чэмпіянаце за «Алімпію» за такi ж гульнявы час адзначалася 6,3 пункта. Яе 18-гадовая аднаклубнiца Яўгенія Бярнацкая па ходзе сезона дапамагала «Алімпіі» ў сярэднім 7,5 ачка, 2,8 падбора і 4 асітамі, а супраць Расіі набрала 3 ачкі.
Цi бачна з такой статыстыкi нейкае павышэнне ўзроўню зборнай? Шчыра кажучы, не. Ды i стан удзельнiц Еўра-2021 выклiкае пытанне. Акей, Марыя Папова і Алекс Бэнтлі выйгралі з УГМК чэмпiянат Расii і, верагодна, паказвалi б сябе i на міжнароднай арэне. Аднак, напрыклад, пяць баскетбалiстак складу трохгадовай даўнiны цяпер у складзе «Гарызонта» без шанцаў прайгралi ЧБ «Мiнску». Адна з iх, Вольга Зюзькова, пасля сезона завяршыла карʼеру ва ўзросце 40 гадоў.
З тых, хто гуляў на ЧЕ-2021, скончыла цяпер і 35-гадовая Аляксандра Тарасава. 27-гадовая Ганна Брыч апошні сезон правяла без клуба. А 36-гадовая Таццяна Ліхтаровіч, якая працягвае гуляць за люксембургскі «Эш», наўрад ці разглядаецца рэжымнiкамi ў зборную пасля таго, як на прэс-канферэнцыі падчас таго Еўра сказала «Верым! Можам! Пераможам!».
Яніна Інкіна і Юлія Васілевіч, якія зганялі на Еўра-2021 за ўражаннямі, а не за гульнявым часам, цяпер гуляюць у Расii – Інкіна з «Рунай» выйграла другі дывізіён, а Васілевіч выступала за ўжо згаданае маскоўскае «Дынама»з апошняга радка Д1.
Ёсць яшчэ задрафтаваная ў жаночай НБА Ксенія Малашка, аднак Трафімава не ўзяла яе на той самы Еўрабаскет быццам бы з-за траўмы – а Малашка распавядала, што гэта была выдумка, а насамрэч коўч прыняла рашэнне па жаданнi вопытных гульцоў, якiм не спадабалася ўсмешка калегi пасля паразы. Думаецца, што пасля такога шансы пабачыць Малашка ў зборнай прывiдныя.
Карацей, заявы Марынінай не вытрымлiваюць праверкi. Хаця для Казахстана і Узбекістана, з якімі ў БФБ нiбыта ёсць нейкія дамоўленасці на першыя за гады матчы не з Расiяй, згуляць супраць Беларусi ўсё роўна будзе добрай практыкай. Азiяцкiя каманды займаюць адпаведна 72-i i 90-ы радок рэйтынгу ФІБА, а беларуская зборная да адхілення займала 11-ы радок.
Іншыя пасты карыстальніка
