Беларуска з драфта НБА вярнулася ў Ізраіль – гуляе за каманду з горада за 40 км ад Сектара Газа
Пры першай спробе з’ехала без афiцыйных матчаў.
Адна з самых таленавітых дзейных беларускіх баскетбалістак Ксенія Малашка летам мінулага года была задрафтаваная «Чыкага Скай» з жаночай НБА.
Але ўжо другі год пасля гэтага Малашка праводзіць па-за межамі ЗША. На свой першы сезон пасля ўніверсітэту яна падпісала кантракт з iзраiльскiм «Рамат Хашарон», паспела правесці з клубам перадсезонку. Але 7 кастрычнiка 2023-га, за пару дзён да старту чэмпіянату, тэрарыстычная групоўка ХАМАС здзейснiла масавую атаку на Iзраiль, што пацягнула за сабою дэ-факта вайну дзяржавы супраць палестынскай арганiзацыi, якая базуецца ў Сектары Газа. Усе спаборніцтвы ў Iзраiлi былі прыпыненыя на нявызначаны тэрмін.
Малашка некаторы час заставалася ў Ізраілі, але ўсё ж пакінула клуб, а ў снежні падпісала кантракт са славацкай «Славіяй» з Банска-Быстрыцы – з гэтым клубам узяла срэбра чэмпіянату i Кубак Славакii.
Пасля завяршэння турніру Малашка транзітам праз Варшаву адправілася ў ЗША, дзе выдатна бавіла час на пляжах Фларыды.
Гуляла ў тэніс у Маямі.
У Нэшвіле прыняла ўдзел у матчы-выставе.
І проста адпачывала.
А ў канцы верасня 24-гадовая баскетбалістка вярнулася ў Ізраіль – падпісала двухгадовы кантракт з «Макабі Бнот» з горада Ашдод.
За сваю гісторыю «Макабі Бнот» шэсць разоў заваёўваў чэмпіёнскі тытул, пяць разоў – Кубак, аднойчы – Суперкубак. На міжнароднай арэне найвышэйшым дасягненнем каманды стаў паўфінал Еўракубка ў сезоне-2014/15. У мiнулым сезоне «Макабі Бнот» стаў трэцiм у «рэгулярцы» чэмпiянату Iзраiля, а затым вылецеў у пауфiнале плэй-оф.
Новы клуб беларускі размяшчаецца ў курортным горадзе Ашдод на беразе Міжземнага мора.
Гэта усяго за 40 кіламетраў ад мяжы з Сектарам Газа, узброены канфлiкт Iзраiля з якiм цягнецца ўжо больш за год і нават не думае прыпыняцца. У дадатак тэрыторыя Iзраiля неаднаразова падвяргалася абстрэлам з боку Лівана і Ірана, а ў розных гарадах краіны адбываліся тэракты.
У пачатку кастрычніка 2024-га, пасля таго, як дзясяткі самалётаў Ізраіля нанеслі ўдары па мэтах у Емене, тамтэйшыя хусiты прыгразілі ўдарамі па Тэль-Авіву і порце Ашдода. Пры гэтым кастрычнiк па габрэйскаму календару прыпадае на цішрэй – месяц, які распачынае год і ўтрымлівае найбольшую колькасць святочных дат. У сувязі з гэтым мэр Ашдода ўжо абвясціў, што горад будуць патруляваць добраахвотнікі, гарадская служба бяспекі і паліцыя.
На гэтым фоне, напрыклад, амерыканскi баскетбалiст Джордан Лойд пакiнуў склад iзраiльскага гранда «Макабі» з Тэль-Авіва. Баскетбаліст расказаў, што калi гэтым летам падпicваў кантракт, лiчыў, што «сітуацыя ўжо наладжваецца», але цяпер прыйшоў да высновы, што ўсё «толькі пагоршылася», таму вырашыў падшукаць сабе больш спакойнае месца.
Малашка ж так рабiць не стала – рыхтавалася да сезона i публiкавала свае фота з пляцоўкi ў перадсезонным турнiры. 14 кастрычніка для «Макабі Бнот» стартаваў новы розыгрыш чэмпiянату – каманда ўпэўнена (103:79) абыграла «Хапаэль Кфар». Праўда, згодна з пратаколам, Малашка (№5) ў гэтай сустрэчы не выходзiла на пляцоўку.
Іншыя пасты карыстальніка
