Ірына Лешчанка: «Думала, што пасля нараджэння дзіцяці завяршу кар'еру, але мне стала цікава працягнуць»
Біятланістка Ірына Лешчанка расказала пра вяртанне ў спорт пасля дэкрэта.
– Якім атрымалася вяртанне ў вялікі біятлон для вас?
– Не лёгкім дакладна. Рада таму, што атрымаўся такі паўнавартасны год водпуску, я адпачыла, дзесьці нават трошачкі засумавала і вырашыла паспрабаваць: як яно будзе пасля нараджэння дзіцяці. Мне проста стала цікава, як адрэагуе мой арганізм, на што ён яшчэ здольны? Хаця, не буду хаваць, думала, што пасля нараджэння дзіцяці ўжо завяршу сваю кар'еру. Але потым чамусьці мне стала цікава прадоўжыць. Пабачым.
– Як з матывацыяй? Хапае яе зараз?
– Матывацыя ёсць. Мне сапраўды вельмі цікава, як яно будзе? Хаця разумею, што мне зараз 30+ і, можа быць, ужо не такі эфект чакаецца пасля нараджэння дзіцяці, як адчувалі дзяўчаты ў 20 гадоў. Чула, што нейкі нерэальны прырост вынікаў у іх здарыўся. Мне зараз цікава, што атрымаецца менавіта ў мяне. Не ведаю, магчыма, адпрацую толькі вось гэты год і больш не пацягну. Мяне пакуль падтрымалі, ухвалілі, дапамагаюць. Дзякуй федэрацыі і трэнерам, якія недзе ідуць мне на саступкі за мае спазненні, – сказала Лешчанка.
