Задзірлівы беларус у біятлоне не першы раз счапіўся з расіянамі – але гэта выключэнне. У асноўным жа сябруюць да глыбіні душы
Праблемы часцей узнікаюць праз арганізатараў.
30 сакавіка падчас мас-старту чэмпіянату Расіі, аднаго з займеннікаў сапраўдных міжнародных турніраў для забаненых праз вайну зборных Беларусі і Расіі па біятлоне, нечакана пацярпела атмасфера так званага «братэрства».
Пасля фінішу ледзь не пабіліся беларус Іван Тулацін і расіянін Яўген Сідараў. Ініцыятарам сутычкі стаў апошні, а ўсё праз тое, што Тулацін падчас гонкі зламаў палку расіяніну. Прадстаўнік беларускай зборнай сцвярджае, што зрабіў гэта неспецыяльна і ўвогуле пасля таго, як Сідараў наехаў яму на лыжу. Прадстаўнік зборнай Расіі распавёў пра спробу абагнаць канкурэнта, якой той нібыта перашкодзіў, і непрыемныя словы на свой адрас. Сідараў прапаноўваў разабрацца пасля фінішу.
Сітуацыя на медалёвыя разборкі не паўплывала: беларус скончыў гонку на 8-м месцы, расіянін адстаў на 10 секунд і стаў 9-м.
23-гадовы падпісант за рэпрэсіі Тулацін толькі пачынаў міжнародную кар'еру, калі былі ўведзеныя санкцыі. У сезоне-2021/22 крыху паспеў пабегаць у другім па значнасці турніры сусветнага біятлону Кубку IBU, няхай і без вялікіх поспеў. А як пачалася вайна, выступае ў Расіі. На пары этапаў тамашняга Кубку браў нават залатыя медалі ў спрынтах.
Для яго гэта не першая сутычка з усходнімі суседзямі. У красавіку мінулага года пасля фінішу ў мас-старце «Кубка Садружнасці» Тулацін наўмысна зачапіў расіяніна Данііла Вусава, паспеў яму нешта сказаць, а яшчэ прадэманстраваць сваю незадаволенасць, пхнуўшы нагой лыжу.
Як выявілася пазней, на апошнім крузе расійскі біятланіст нібыта выпадкова наехаў на лыжу Тулаціна – і той упаў, згубіўшы час і грошы (прызавыя былі прадугледжаныя за 1-6 месцы) – Вусаў скончыў гонку 4-м, беларус адстаў на 6 секунд і фінішаваў 7-м.
Іван Тулацін
Але выглядае на тое, што канфлікты Тулаціна з расійскімі спартсменамі – выключэнне. Бо хутчэй беларусы церпяць не ад калег-біятланістаў, а ад арганізатараў турніраў. Спартыўны прыклад такога непаразумення меў месца ў снежні 2023 года, калі двойчы давялося пераглядаць вынікі мужчынскай гонкі пераследавання на «Кубку садружнасці».
Тады беларус Дзмітрый Лазоўскі змагаўся за прызавыя ў топ-6, але, як падавалася, выбыў з барацьбы пасля трэцяй стральбы. Лазоўскі пацэліў у дзве мішэні, а трэцяя была закрытая, бо ў яе стрэліў расійскі біятланіст – суддзі на замінку не зрэагавалі аператыўна і беларус згубіў 1 хвіліну і 10 секунд. Фінішаваў 10-м і з гэтай нагоды моцна абураўся.
Але суддзі ўсё ж такі перагледзелі вынікі гонкі – аднялі ад часу беларуса тую хвіліну з хвосцікамі, і Лазоўскі ўзняўся на 4-е месца. Але гэта абурыла ўжо расіян, якія палічылі, што час скінулі празмерна. Вынік беларуса перагледзелі яшчэ раз – і Лазоўскі стаў 6-м.
Нечакана, але часцей сустракаюцца не спартыўныя, а палітычныя непаразуменні. Здавалася б, калі на думку беларускай і расійскай дыктатур іх спартсмены несправядліва пазбаўленыя міжнародных стартаў, то трэба трымацца адзін аднаго. Але яшчэ ў мінулым годзе мы пісалі, як расіяне нават гімн сваім беларускім калегам па бану не ўключалі, праз што некаторыя пакутавалі да слёз.
Да таго ж у чэмпіянаце Расіі беларусы па-ранейшаму выступаюць па-за залікам, таму нават калі займаюць прызавыя месцы, узнагарод не атрымліваюць. Чарговы раз пра гэта згадалі 26 сакавіка, калі расіянін Карым Халілі аддаў золата за перамогу Дзмітрыю Лазоўскаму, які фінішаваў першым у спрынце чэмпіянату Расіі. Халілі свой учынак пракаментаваў сціпла і папракнуў арганізатараў, а беларус у сваю чаргу кінуў рэспект расіяніну, назваўшы таго «прыстойным пацаном».
Сітуацыя не першы раз абурыла зэт-каментатара Дзмітрыя Губерніева, які назваў неўдзел беларусаў у заліку чэмпіянату Расіі ганьбай і паабяцаў давесці праблему да міністра спорту краіны-агрэсара. Пасля трох страчаных гадоў на міжнародным узроўні беларускім біятланістам застаецца толькі спадзявацца, што іх нарэшце цалкам прызнаюць за сваіх у Расіі.
Расійскія біятланісты не першы раз аддаюць медаль сябрам па міжнароднаму бану. Гэтаксама ў лютым-2024 у нейкай суседскай спартакіядзе адна з расійскіх каманд аддала бронзу беларускай зборнай, чый удзел спачатку не быў запланаваны.
Месяцам пазней квартэту з Ганны Солы, Дзінары і Антона Смольскіх і Дзмітрыя Лазоўскага золата за перамогу ў змешанай эстафеце чэмпіянату Расіі перадаў расіянін Раман Яромін. Дзеля гэтага ён завітаў у госці да Смольскіх.
Увогуле па-за лыжнёй беларусы с расіянамі сябруюць. Напрыклад, Смольскія падтрымліваюць добрыя стасункі з сям'ёй Аляксандра Паварніцына. Антон Смольскі дык увогуле шчыра распавядаў сваім расійскім калегам Эдуарду Латыпаву, Максіму Цвяткову і Васілю Томшыну пра сімпатыю да КДБ.
Ганна Сола падчас сезона тусавалася з расіянкамі Ірынай Казакевіч і Тамарай Дзярбушовай, якія апярэджваюць яе ў агульным заліку так званага «Кубку Садружнасці».
Нават з былой расійскай біятланісткай, чый муж загінуў на злачыннай вайне ва Украіне, беларускі на сувязі.
Карацей кажучы, канфлікты, як у Тулаціна, – вельмі і вельмі рэдкая з'ява ў гэткай сяброўскай ідыліі.
За свае паводзіны Тулацін і Сідараў атрымалі ўмоўную дыскваліфікацыю. То бок калі яшчэ раз дазволяць сабе нешта такое, то прапусцяць адну гонку.
Іншыя пасты карыстальніка
