Не можа забіць, хаця момантаў дастаткова, шмат прапускае, але брамнік ратуе. Чаму «Дынама» Брэст валіцца на старце сезону

Перад стартам сезона брэсцкае "Дынама" выглядала прэтэндэнтам на топ-5 у чэмпіянаце Беларусі. Клуб падпісаў спаважнага трэнера (Ігару Крывушэнку давяралі зборную Беларусі). Захаваў вопытных Міхаіла Гардзейчука, Эдгара Аляхновіча і галкіпера-«лімітчыка» Міхаіла Казакевіча (лідары складу ў 2022-м). Плюс зімой падпісаў Сяргея Кісляка (чэмпіёна-2019, уласна, з Брэстам), Дзмітрыя Багу (чэмпіёна з БАТЭ), Аляксандра Макася, Дзяніса Садоўскага і Кірыла Сідарэнку. Пра жаданне бачыць «Дынама» ў пяцёрцы наймацнейшых казаў і намеснік старшыні выканкама Лукашэнкі па Брэсцкай вобласці Валянцін Зайчук - галоўны апякун клуба.

Але старт сезона для «бела-сініх» выйшаў правальным: 0 ачкоў (адзіная каманда ў лізе без набраных балаў), 0 забітых мячоў (адна з двух такіх каманд у лізе) і апошняе месца пасля трох стартавых тураў - пры гэтым «Дынама» яшчэ не сустракалася ні з кім з леташняга топ-4. Ужо пачаліся размовы пра магчымую адстаўку Крывушэнкі, якія ён сам жа пасля паядынку супраць "Славіі" і пракаментаваў.

- Крытычная рэакцыя часткі заўзятараў? Магу зразумець іх. Яны прыйшлі па станоўчыя эмоцыі. Яны іх не атрымалі. Натуральна, казёл адпушчэння ў такой сітуацыі заўсёды трэнер. Чуць непрыемна. Мая задача - выправіць тое, што пакуль не атрымліваецца. А вырашаць мой лёс - ёсць кіраўніцтва. Але я лічу, што пакуль нейкія глабальныя высновы рабіць рана, - сказаў коуч.

Паспрабуем разабрацца, што не так з самай наведвальнай камандай на старце (у сярэднім 5100 чалавек).

Крывушэнка шукае на старце аптымальныя спалучэнні і мяняе схему

«Дынама» Брэст - лідар па колькасці палявых гульцоў, што былі задзейнічаны на старце сезона. Крывушэнка за тры гульні прапусціў праз склад 20 чалавек - такую ж колькасць выкарыстаў і Іван Біёнчык ў «Славіі».

Новы трэнер брэстаўчан супраць "Іслачы" і Мазыра рабіў па тры змены ў складзе ў параўнанні з папярэднім турам. Больш за тое, трэнерскі штаб усё яшчэ знаходзіцца ў пошуках базавай схемы: у першых двух матчах «Дынама» пачынала з расстаноўкі 4-3-3, супраць "Славіі" ж выйшла з трыма цэнтральнымі абаронцамі і парай форвардаў Канцадайлаў-Сідарэнка.

Адна з найгоршых абарон на старце (не ратуюць нават сейвы галкіпера)

Часцей за ўсё карэктывы ўносяцца ў абарончую лінію: за тры стартавыя туры ў складзе «Дынама» выходзіла ўжо восем абаронцаў. Пры гэтым у брэстаўчан адна з найгоршых абарон у дэбюце сезона: 5 прапушчаных галоў (больш толькі ў «Смаргоні» і «Гомеля») і 6,34 па паказчыку дапушчанага ля сваіх варот xG (чаканых галоў) - то-бок у каманды магло быць куды больш прапушчаных мячоў, калі б не надзейная гульня Міхаіла Казакевіча. Напрыклад, ужо на першай хвіліне матча супраць "Славіі" (0:1) галкіпер маладзёжнай зборнай пацягнуў удар з блізкай адлегласці ад Андрэя Кобеца пасля таго, як за сваімі апанентамі не паспелі спачатку Дзмітрый Зіновіч, а затым Аляксей Фірсаў (адзнака 1:07).

Асабліва ўсё дрэнна было ў матчы супраць "Іслачы" (0:3), дзе "Дынама" дапусціла 3,93 xG каля сваіх варот (больш у цяперашнім чэмпіянаце пакуль не было ні ў каго) пры 23 ударах ад "ваўкоў" (таксама антырэкорд сезона). Амаль на цэлы гол менш чаканага ў матчы «бела-сінія» зноў прапусцілі дзякуючы намаганням Казакевіча: у пачатку другога тайма пры ліку 0:1 ён пацягнуў удар ва ўпор у выкананні Прынса Аду (адзнака 7:32).

Акрамя таго, Брэст "лідаруе" па колькасці дапушчаных небяспечных атак (атакі з пранікненнем гульцоў суперніка ў штрафную або вострай перадачай/прастрэлам) у лізе - іх за тры гульні ў пасіве 167, у той час, як другі найгоршы паказчык у чэмпіянаце - 157 атак – належыць «Слуцку».

Вялікія пытанні да рэалізацыі

Пры гэтым са стварэннем момантаў у "Дынама" пытанняў няма: брэстаўчане ідуць на трэцім месцы ў лізе па вострых атаках - 153 за тры паядынкі (больш толькі ў мінскага "Дынама" (176) і "Іслачы" (166)). Таксама вельмі нядрэнны ў падапечных Крывушэнка паказчык xG - 3,54 па суме ўсіх матчаў. Але Брэст усё яшчэ застаецца адной з дзвюх каманд чэмпіянату з нулём у графе «забітыя мячы» (таксама ўсё яшчэ не можа забіць «Белшына», якая пры гэтым прапускала адзін тур).

У першым туры супраць «Тарпеда-БелАЗ» пры 0:0 мог забіваць Міхаіл Гардзяйчук - яго ўдар пацягнуў галкіпер жодзінцаў Яўген Абрамовіч (адзнака 1:46).

А ў пачатку другога тайма пасля кутняга выдатную магчымасць змарнаваў Дзмітрый Бага (адзнака 2:47).

З «Іслаччу» ў Гардзейчука з'явіўся момант пасля памылкі галкіпера суперніка, які аддаў мяч проста ў ногі - гэтым дасведчаны вінгер таксама не скарыстаўся (адзнака 3:43).

Са «Славіяй» спачатку быў добры момант пры 0:0, але ўдар Сяргея Кісляка адбіў Арцём Каратай (адзнака 1:36).

А ўжо пры 0:1 Кірыл Сідарэнка пасля паса ўсё таго Кісляка недакладна прабіў з межаў штрафной (адзнака 5:55).

Характэрна, што змену схемы пасля матчу супраць "Іслачы" Крывушэнка сам тлумачыў намерам павялічыць прастору ў атацы для сваіх гульцоў, але на практыцы, як паказала гульня супраць "Славіі", футбалісты пакуль не зусім зразумелі, што рабіць з гэтай прасторай.

Два выдаленні ў двух стартавых турах не ў гульнявых момантах

У двух стартавых турах «Дынама» заканчвала удзесяцёх, прычым абодва разы заставалася ў меншасці даволі рана: Аляхновіч у гульні супраць «Тарпеда-БелАЗ» атрымаў сваю картку адразу пасля свістка на перапынак, калі лік на табло быў 0:0, Макась супраць "Іслачы" - на 59-й хвіліне пры ліку 0:1. Абодва выдаленні здарыліся ў негульнявых эпізодах: адзін ударыў па твары Дзмітрыя Лісаковіча, другі паказаў непрыстойны жэст трыбунам.

Ігар Крывушэнка ў абодвух момантах не ўбачыў нічога крымінальнага ў дзеяннях сваіх гульцоў. Пра ўдар Аляхновіча сказаў, што капітан проста «разводзіў [рукі], ну і патрапіў яму», а жэст Макася апраўдаў тым, што толькі «пачасаў чалавек прычыннае месца».

«Дынама» і «Энергетык-БДУ» - самыя недысцыплінаваныя каманды старту сезона. Брэстаўчане і мінчане зарабілі па 11 картак: у "Дынама" 9 жоўтых і 2 чырвоных, у "Энергетыка-БДУ" - 10 жоўтых і 1 чырвоная.