Перад сезонам казалі, што Брэст – прэтэндэнт на топ-5, але пакуль гэта поўнае расчараванне (і зорныя ветэраны не цягнуць). Радуе толькі колькасць людзей на трыбунах

Брэст сёлета вяртае сабе статус самага футбольнага горада краіны: наведвальнасць матчаў мясцовага «Дынама» падрасла ў два з паловай разы ў параўнанні з сезонам-2022 і складае на сёння 4960 гледачоў – гэта больш, і чым у мінскага «Дынама» (4932), і ў «Гомеля» (2964 гледачы), на які апошнія два сезоны хадзілі лепш за ўсё.

І гэта пры тым, што першы круг атрымаўся для каманды правальным: у 14 турах «бела-сінія» толькі тройчы перамаглі, здабылі адну нічыю, а яшчэ дзесяць разоў прайгралі – горш выступалі толькі «Нафтан» (дзве перамогі і дзве нічыі) і «Белшына » (дзве перамогі і тры нічыі). Пры гэтым першую палову сезона брэстаўчане закрылі паразай якраз ад бабруйчан. Ключавы эпізод матчу адбыўся ў канцы першага тайма, калі абаронца дынамаўцаў Ілля Калпачук ледзь не знёс галаву форварду гаспадароў Іллі Сеню – госці атрымалі падвойнае пакаранне ў выглядзе выдалення і пенальці. 11-метровы быў рэалізаваны, а ў меншасці «Дынама» адыграцца не здолела – 0:1.

Праблемы з дысцыплінай – адна з прычын брэсцкіх няўдач. Выдаленне ў Бабруйску – чацвёртае за 14 матчаў. Ужо ў першым туры пакінуў сваю каманду пры ліку 0:0 у меншасці Эдгар Аляхновіч, які ўдарыў у канцоўцы першага тайма Дзмітрыя Лісаковіча з «Тарпеда-БелАЗ» – у другой палове сустрэчы жодзінцы забілі і павезлі дадому мінімальную перамогу (адзнака 2:17).

У другім туры супраць «Іслачы» недарэчнае выдаленне зарабіў Аляксандр Макась у пачатку другога тайма пры ліку 0:1 на карысць «ваўкоў» – ужо маючы папярэджанне, форвард схапіўся для чагосьці за прычыннае месца, калі аб чымсьці з кімсьці спрачаўся на трыбунах. У большасці «Іслач» упэўнена давяла гульню да перамогі, забіўшы яшчэ двойчы (адзнака 8:31).

Адзінае выдаленне, якое не паўплывала на вынік, – чырвоная Дзяніса Кавалевіча ў канцоўцы матчу супраць «Нафтана». Хаўбек брэстаўчан пасля сутыкнення з гульцом суперніка вырашыў з ім высветліць адносіны і па выніках слоўнай сваркі «баднуў» таго. «Дынама» да таго моманту ўжо вяло 3:0 (інцыдэнт на адзнацы 7:36).

«Дынама» лідаруе не толькі па колькасці чырвоных картак у чэмпіянаце, але і па колькасці жоўтых: іх у «бела-сініх» за першую частку чэмпіянату 29. Асабліва пастараўся Ігар Тыманюк: паўдзельнічаў у дзесяці матчах і сабраў шэсць папярэджанняў.

Трэнерская перастаноўка камандзе дапамагла, але магутнага штуршку не дала. Пасля паражэння ў чацвёртым туры ад «Слуцка» на змену Ігару Крывушэнку прыйшоў Аляксандр Юрэвіч, які раней не працаваў галоўным трэнерам дарослых каманд. Пры ім у дзесяці матчах здабыта тры перамогі пры шасці паразах і адной нічыёй. Падводзячы вынікі першага круга, спецыяліст узяў усю віну за вынікі на сябе і папрасіў прабачэння ў заўзятараў клуба.

- Першае круг скончылі вельмі сумна. За першы круг нам вельмі-вельмі сорамна. Чарговы раз хочацца папрасіць прабачэння ў заўзятараў. Заўсёды ў першую чаргу вінаваты трэнер. Так, я з сябе віны не здымаю. У любой сітуацыі можна быць песімістам, але не хочацца. Усё ж такі ёсць другі круг. Будзе паўза, у якой, магчыма, нехта да нас прыйдзе і ўзмоцніць. Трэба ўдвая працаваць. Ад смешнага да вялікага – адзін крок, – сказаў Юрэвіч.

Бяда ў атацы: больш за адзін мяч забіў толькі адзін гулец

Вялікія праблемы Брэст мае ў атацы: менш (12 галоў) забілі толькі «Энергетык-БДУ» (6), «Нафтан» (7) і «Белшына» (10). Клуб не адгадаў з зімовымі падпісаннямі нападаючых Кірыла Сідарэнкі і Аляксандра Макася: першы забіў у чужыя столькі ж, колькі ў свае (па адным, прымым усё гэта ў матчы супраць мінскага «Дынама»), другі запомніўся толькі выдаленнем, траўмай і тым, што за шэсць матчаў ні разу не паразіў чужыя вароты).

Нічым не дапамагае найбліжэйшы рэзерв: у івуарыйца Седрыка Куадыё 1+1 у 9 матчах, а маладыя Кірыл Цапянкоў, Мікіта Люкевіч, Уладзіслаў Сугак і Мікіта Бурак зусім не набралі ніводнага рэзультатыўнага бала. Варта адзначыць, што з Сідарэнкам брастаўчане ўжо рассталіся. Таксама ў летнюю паўзу клуб пакіне атакуючы хаўбек Арсеній Канцадайлаў (0+1 у 10 матчах).

Ды і ў цэлым у брастаўчан больш за адзін мяч за круг забіў толькі вопытны Міхаіл Гардзяйчук – 33-гадовы вінгер аформіў 4+2 у 11 матчах. Праўда, тры галы з чатырох прыпалі на нічыйную гульню з «Гомелем» (3:3).

Характэрна, што другім па паказчыку «гол+пас» у камандзе ідзе іншы гулец чэмпіёнскага Брэста-2019 Сяргей Кісляк. У 35-гадовага хаўбека асіст супраць БАТЭ (1:2) і пераможныя 1+1 супраць «Смаргоні» (2:1).

Але праблемы ў каманды не толькі з рэалізацыяй момантаў, але і з іх стварэннем: па паказчыку xG (чаканыя галы) «Дынама» (12,59) толькі на 13-м месцы, апярэджваючы «Энергетык-БДУ» (11,41) і «Нафтан» (11,53).

І Юрэвіч, і ягоны памочнік Сяргей Нікіфарэнка, які прыходзіць на прэс-канферэнцыі з прычыны таго, што па паперах зʼяўляецца галоўным трэнерам, кажуць пра тое, што каманда мае вострую патрэбу ва ўзмацненні.

У абароне паспрабавалі шмат спалучэнняў, не вызначыліся з асноўным галкіперам

Гульня ў абароне ў брастаўчан таксама далёкая ад ідэалу: 24 прапушчаныя мячы ў 14 матчах – горш толькі «Нафтан» (25), «Гомель» (27), «Смаргонь» (27) і «Белшына» (29). Пры гэтым паказчык xGA (чаканыя прапушчаныя мячы) у «Дынама» складае 19,42 – досыць не маленькая розніца сведчыць пра тое, што не заўсёды эфектыўна выступаюць галкіперы.

У гэтым сезоне згулялі ўжо абодва брамнікі першай каманды: асноўным пачынаў Міхаіл Казакевіч, але пасля серыі з пяці паражэнняў яго месца заняў Дзяніс Садоўскі – і наступныя тры матчы правёў ужо ён. Далей на два матчы вярнулі Казакевіча, зноў далі дзве гульні Садоўскаму і зноў вярнулі на апошнія два туры Казакевіча. Дзве перамогі (абедзве – «сухія») каманда здабыла пры Садоўскім, адну – пры Казакевічу. Міхаіл прапусціў 15 мячоў у 9 гульнях, Дзяніс – 9 у 5.

Няма вызначанасці і ў выбары асноўнай пары цэнтральных абаронцаў. Усе матчы першага круга ад званка да званка правёў малдаўскі абаронца Арцём Літвякоў, а ў пары з ім паспелі згуляць Дзмітрый Зіновіч, Аляксей Фірсаў, расіянін Арцём Япрынцаў, а напрыканцы чэрвеня брастаўчане падпісалі камерунца Джорджа Мусінгу, які і склаў пару Літвякову ў двух апошніх турах. – верагодна, якраз пара Літвякоў-Мусінга плануецца як асноўная на другую частку сезона.

Дасведчаныя гульцы часта выбываюць праз траўмы

«Дынама» ў мінулю зіму падпісала адразу некалькіх дасведчаных выканаўцаў, якія ведаюць, што такое змагацца за высокія месцы: падоўжылі Гардзейчука і Аляхновіча, вярнулі з Мінска Кісляка, з Гомеля выпісалі Багу і Макася – з такімі трансферамі Брэст выглядаў прэтэндэнтам на топ-5 у ЧБ.

Але праз траўмы ўся пяцёрка ў поўным складзе была ў заяўцы на матч толькі ў першым туры супраць «Тарпеда-БелАЗ» (0:1), далей жа на аднаго-двух, а часам і на трох ветэранаў трэнерскі штаб не мог разлічваць. У другім і трэцім туры быў недаступны Аляхновіч (дыскваліфікацыя), з трэцяга па пяты – Гардзяйчук (траўма), з шостага па 12-ы – Макась (дыскваліфікацыя і траўма), з сёмага па дзясяты – Кісляк (траўма), з восьмага па чатырнаццаты – Бага (траўма).