Бос «Дняпра» загадаў сачыць за трэнерам – так хоча яго звольніць, а падстаў пакуль няма
Вось чым Алег Радушка раз'юшыў кіраўніка.
9 траўня пасля перамогі над «Хваляй» 2:1 галоўны трэнер «Дняпра» Алег Радушка распавёў пра дзіўную сітуацыю – праўда, не ўдаючыся ў канкрэтыку – у магілёўскім клубе. Спецыялісту яна нагадвае 90-я.
– Што мяне засмучае – гэта тое, што робіцца ў нас у клубе. Такое адчуванне, што я вярнуўся ў 90-я гады, калі людзі жылі без закона, правілаў, павагі і з нянавісцю да іншых людзей. Я не разумею, што адбываецца, усё ж такі цяпер XXI стагоддзе. Мне страшна пра гэта казаць, што цяпер адбываецца ў маёй роднай камандзе, у якой я адгуляў сем сваіх найлепшых гадоў і забіў 56 галоў. Гэта проста жудасна. На жаль, але гэта праўда. Напэўна, буду звяртацца ў кампетэнтныя ворганы, – выдаў блытаны спіч 58-гадовы Радушка.
Неўзабаве прэс-служба «Дняпра» выдаліла з усіх пляцовак выказванне трэнера. «Трыбуна» ўсё ж здолела высветліць прычыны абурэння.
На наступны дзень пасля рэзананснай прэс-канферэнцыі інсайдары пачалі пісаць, што ў найбліжэйшы час кіраўніцтва «Дняпра» і галоўны трэнер, які працуе з камандай ад ліпеня 2024-га, будуць вырашаць пытанне аб працягу супрацы. Таксама паведамляецца, што ў магілёўскім клубе маюць намер на месца Радушкі паставіць Станіслава Суворава, які яшчэ зімой увайшоў у трэнерскі штаб «Дняпра».
Радушку паведамілі, што з ім не маюць намеру працягваць супрацу, нягледзячы на дзейны да канца 2025-га кантракт. Першы трэнінг у міжсезонне правёў Сувораў, ён жа прыступіў да камплектавання калектыву, нягледзячы на тое, што афіцыйна галоўным трэнерам «Дняпра» заставаўся Радушка. Таго ў выніку звольніць не змаглі – трэнер запатрабаваў тры заробкі ў якасці кампенсацыі за датэрміновы разрыў кантракту, то бок каля 15 тысяч рублёў агулам. У «Дняпры» плаціць адмовіліся – і Радушка працягнуў працаваць.
Пра такія ж намеры «Трыбуна» пісала ў студзені гэтага года. Тады незадоўга да выхаду каманды з адпачынку
З тых часоў у клубе адбыліся некаторыя змены. У канцы красавіка новым старшынём замест Сяргея Капытава стаў Дзмітрый Чыгір, які да таго працаваў дырэктарам Магілёўскага абласнога цэнтра па лёгкай атлетыцы і гульнявых відах спорту «Алімпіец». Пра тое, што менавіта ён стане новым босам ФК, мы таксама пісалі ў студзені 2025-га. Як і пра тое, што менавіта ён ініцыяваў запрашэнне Суворава на замену Радушкі (яшчэ да афіцыйнага прызначэння Чыгір заняўся клубнымі пытаннямі, тады як Капытаў заставаўся старшынём шмат у чым фармальна).
Стаўшы старшынём «Дняпра» і на паперах, Чыгір толькі ўзмацніў ціск на Радушку. Па нашых звестках, у пачатку траўня трэнер і яго новы начальнік сустрэліся і дагаварыліся да таго, што сталі ў непрыстойнай форме пасылаць адзін аднаго куды далей. Як кажуць нашыя крыніцы, абмяркоўвалася пытанне датэрміновага скасавання кантракту з Радушкам.
Трэнеру, паводле нашых звестак, наўпрост паведамілі, што працаваць з ім далей не маюць намеру. Той заявіў, што гатовы сысці з кампенсацыяй. Але толькі калі раней настойваў на зарплаце за тры месяцы, то цяпер хоча выплаты ўсіх грошай, належных да канца дзеяння кантракту, а гэта ўжо каля 40 тысяч рублёў.
Такія патрабаванні разʼюшылі Чыгіра, які і паслаў суразмоўцы. У адказ пачуў тое ж самае. Гэтым сустрэча і завяршылася. Чыгір напрыканцы прыстрашыў, што ўсё роўна знойдзе спосаб, як звольніць Радушку.
Пры гэтым падстаў звальняць трэнера па спартыўным прынцыпе на сёння проста няма. Пад кіраўніцтвам Радушкі ў гэтым сезоне каманда правяла дзевяць матчаў. Два ў Кубку (абгуляла «Крумкачы» 1:0, але затым вылецела ў 1/8 фіналу пасля мінімальнага паражэння ад «Іслачы» з вышэйшай лігі), а ў чэмпіянаце Д2 дзеліць першае месца з БАТЭ-2 пасля сямі тураў: чатыры перамогі, дзве нічыі і адна параза. Перад «Дняпром» стаіць задача вярнуцца ў эліту, і пакуль магілёўцы ідуць да гэтай мэты. Да таго ж, як кажуць нашыя крыніцы ў камандзе, футбалісты цалкам задаволеныя цяперашнім галоўным, атмасфера ў калектыве выдатная, патрабаванні Радушкі ўсе ўспрымаюць адэкватна.
Чыгір жа вырашыў падступіцца з іншага боку. Па нашых звестках, з ініцыятывы функцыянера да Радушкі быў прыстаўлены нейкі чалавек, які сочыць ледзь не за кожным крокам: прысутнічае на трэнінгах (толькі ў распранальню не заходзіць), часам бывае на тэорыі – агулам, кантралюе практычна ўсе працоўныя працэсы. Больш за тое, па звестках крыніц «Трыбуны», гэты «наглядчык» ходзіць за Радушкам нават у непрацоўны час. Як апісалі нашыя суразмоўцы, «сочыць ледзь не за тым, што трэнер купляе ў краме». Усё робіцца для таго, каб падлавіць Радушку на чымсьці такім, што можна будзе інтэрпрэтаваць як парушэнне. Шукаецца фармальная нагода для звальнення.
Але трэнер, як кажуць крыніцы «Трыбуны», адказна выконвае сваю працу і па-за трэнавальным працэсам таксама не дазваляе сабе вольнасцяў. Зрэшты, сітуацыя ўсё ж напружвае, аднак у тым, што спецыяліст сапраўды звернецца ў «кампетэнтныя ворганы», нашыя суразмоўцы не ўпэўненыя. Для гэтага трэба мець нейкія доказы – не факт, што Радушка іх можа сабраць.
Чым і калі завершыцца гэты канфлікт, невядома. Аднак відавочна, што Чыгір і Радушка знаходзяцца ў стане вайны. Мэта боса – аддаць каманду Сувораву. Апошні, знаходзячыся паміж двух агнёў, як кажуць суразмоўцы «Трыбуны», «пачуваецца выдатна, упэўнена і проста чакае вырашэння пытання на сваю карысць».
Іншыя пасты блога
