Даведаліся, куды знік экс-гулец зборнай, які паказваў голы азадак заўзятарам БАТЭ
Яшчэ нядаўна бегаў за дзве каманды – і раптам нідзе.
22 сакавіка двойчы чэмпіёну Беларусі, уладальніку Кубка і Суперкубка краіны Філіпу Рудзіку споўнілася 38. Ні ў адной беларускай камандзе (і не толькі беларускай) яго цяпер не знайсці, хоць заявы пра завяршэнне карʼеры не было. «Трыбуна» даведалася, чым цяпер займаецца футбаліст.
Ураджэнец Санкт-Пецярбурга пагуляў амаль за дзясятак беларускіх клубаў, узяў пару трафеяў, выступаў у чэмпіянатах Казахстана і Польшчы, а таксама правёў некалькі матчаў за зборную Беларусі. Адзначаўся скандальнымі выхадкамі (самая эпічная – голы азадак для заўзятараў БАТЭ) і заявамі. Толькі летась ён паспеў пагуляць за два калектывы. У другой лізе пыліў у «Мёрах», падкрэсліваючы, што гэта цалкам аматарская каманда, якая нават не трэнуецца, а гульцы, у якіх ёсць асноўная праца, проста атрымліваюць за матч каля 100 рублёў.
Рудзік казаў тады, што спрабаваў аддаліцца ад футбола, знайсці сябе дзесьці яшчэ, але не змог, таму што «хворы на футбол». З «Мёрамі» экс-гулец зборнай паўдзельнічаў у эпахальным матчы з «Расонамі», якія былі абгуляныя 50:0. Паўабаронца тады адзначыўся 5 галамі і 20 (!) асістамі.
Паралельна з «Мёрамі» Рудзік бегаў у расійскім аматарскім турніры за мінскую медыйную каманду DMedia, куды прыйшоў у жніўні 2023-га.
Аднак гэты год футбаліст пачаў без клуба і нават без каманды – як аказалася, зусім сышоў з футбола. Прычым са сваімі апошнімі калектывамі расстаўся практычна адначасова.
У снежні DMedia у сябе ў сацсетках абвясціла пра сыход Рудзіка. Па звестках «Трыбуны», расставанне ініцыяваў сам футбаліст.
Як распавялі нашыя крыніцы, знаёмыя з сітуацыяй, паўабаронца спраўна трэнаваўся. На час падрыхтоўкі да турніраў DMedia здымала для яго кватэру ў Мінску – сам жа Рудзік жыве ў Наваполацку. У кватэру ён заязджаў з сябрам – мараканцам Ясінам Барам, з якім гуляў у «Мёрах» у сезоне-2023 і якога прывёў у медыйны калектыў.
Нягледзячы на статус былога гульца зборнай, Рудзік атрымліваў у матчах мала часу. У нейкі момант ён агучыў сваю незадаволенасць – заявіў, што лічыць сябе вартым большага. Неўзабаве бакі вырашылі расстацца. Усяго паўабаронца правёў за DMedia 14 матчаў (703 хвіліны), адзначыўшыся адным голам.
Прыкладна тады ж скончылася гісторыя з «Мёрамі». Каманда ў мінулым сезоне выйшла ў фінальны этап чэмпіянату Беларусі, але ў групе заняла трэцяе месца і ў плэй-оф не патрапіла (далей прайшлі «Стэнлес» і «Мінск-2»). На фінальным этапе паўабаронца выйшаў у двух матчах (абодва – у старце) і адзначыўся жоўтай карткай.
Па нашых дадзеных, «Мёры» хацелі, каб гулец застаўся і на сезон-2025, аднак той вырашыў не проста сысці з калектыву, а наогул завязаць з футболам. Падставай для рашэння сталі траўмы, адсутнасць матывацыі гуляць на пасрэдным узроўні і зусім ужо сціплыя грошы, дзеля якіх не было ахвоты рызыкаваць у матчах з аматарамі.
Вось ужо некалькі месяцаў Рудзік далёкі ад футбола, ды і наогул знік з медыяпрасторы. Як нам удалося даведацца, цяпер былы футбаліст зборнай Беларусі ў Наваполацку працуе ў таксі, а таксама часам рознарабочым на будоўлі. Ну а вольны час прысвячае сямʼі – жонцы і дачцэ.
Іншыя пасты блога
