Развязка пераносіцца. Лідары чэмпіянату свету па мотакросе пасля Гран Пры Турцыі чэмпіёнамі не сталі

Фота: mxgp.com і x.com/mxgp

Да канца сезону сусветнага мотакросу застаецца ўсяго-нічога, але барацьба за тытулы пакуль што не завершаная не ў адной з катэгорый. І гонкі ў Аф’ёнкарахісары ў мінулыя выхадныя толькі павысілі градус напружанасці.

Хаця, калі казаць пра малодшую катэгорыю MX2, то ў ёй шанцы Кая дэ Вольфа стаць новым чэмпіёнам значна вышэйшыя, чым нават у яго бліжэйшага пераследніка і адначасова яго ж напарніка па Nestaan Husqvarna Factory Racing Лукаса Коэнэна. Які, аднак, не здаецца, і на турэцкім этапе адзначыўся перамогай, прычым здабытай у барацьбе ў тым ліку з нідэрландцам.

Але не толькі з ім. У першай нядзельнай гонцы бельгійцу выклік сваім стартавым хол-шотам кінуў яго канкурэнт з Red Bull GASGAS Factory Racing Сімон Лангенфельдэр. А пазней цягам гонкі – паспяховай зваротнай атакай на Коэнэна, які апярэдзіў яго на першых кругах. Аднак Лукас у сваю чаргу атакаваў на перадапошнім кругу, адваяваў у немца першую пазіцыю і перамог у гонцы.

Лангенфельдэр фінішаваў другім, а замкнуў першую тройку пераможца кваліфікацыйнай гонцы Red Bull KTM Factory Racing Ліам Эвертс, для якога першы з асноўных заездаў выдаўся даволі няпростым. Але яшчэ больш няпростым ён быў для дэ Вольфа, які на першым кругу ледзь не паўдзельнічаў у завале, што зладзілі некалькі яго супернікаў.

На шчасце Кая, ён здолеў аб’ехаць месца здарэння за межамі трасы, але затым вымушаны быў прарывацца. Што, варта адзначыць, атрымалася ў лідара чэмпіянату нядрэнна – ён фінішаваў чацвёртым. А ў другой гонцы нават прэтэндаваў на перамогу, але…

Хол-шот тады дастаўся Коэнэну, але дэ Вольф абагнаў яго ўжо ў другім павароце, і затым доўгі час узначальваў заезд. Калі дакладней, то да апошняга круга, на якім Лукас здзейсніў сваю рашучую атаку, хоць некалькі папярэдніх кругоў трымаўся ў некалькіх секундах ззаду ў напарніка.

Адпаведна, менавіта ён і атрымаў выніковую перамогу ў Гран Пры Турцыі, а дэ Вольф задаволіўся другім месцам. Трэцім у другой гонцы фінішаваў Monster Energy Triumph Racing Мікел Хааруп, аднак на ніжнюю ступень подыуму ўзышоў усё ж такі Лангенфельдэр, які дабраўся да фінішнай брамы акурат за нарвежцам.

Кай дэ Вольф тым не менш захаваў чырвоную таблічку лідара. За два этапы да канца сезона ў яго 873 ачкі супраць 829-ці ў Коэнэна, які застаецца другім. Лангенфельдэр, маючы 774 балы, у сваю чаргу замыкае першую тройку. Затое Husqvarna з 995-цю ачкамі болей чым упэўнена ўзначальвае ў MX2 залік вытворцаў. KTM, у якога 866 пунктаў, на другой пазіцыі, трэцюю, маючы 781 пункт, займае GASGAS.

Не стаў вырашальны турэцкі Гран Пры і ў старэйшай катэгорыі MXGP. Дзейны чэмпіён з заводскага калектыву GASGAS Хорхе Прада, вядома, імкнецца абараніць тытул, і ў Аф’ёнкарахісары іспанец зрабіў да гэтага важны крок. Хаця цягам уік-энду, ён, верагодна, быў і не галоўнай дзейнай асобай.

Той жа лідар чэмпіянату з заводскай Хонды Цім Гайсэр таксама быў поўны рашучасці наблізіцца да свайго яшчэ аднаго тытулу. Славенец выйграў кваліфікацыйную гонку ў суботу, але першую з нядзельных пачаў не лепшым чынам. Не так дрэнна, як прадстаўнік Kawasaki Racing Team Рамэн Фэвр, які ўпаў, не дасягнуўшы і першага павароту, але напарнік француза Джэрэмі Сівер з першага павароту выйшаў акурат перад Цімам (і, адпаведна, выйграў хол-шот).

Здавалася б, швейцарац Гайсэру не канкурэнт, і атака з боку апошняга не прымусіць сябе чакаць. Але замест гэтага спачатку напарніка Ціма Рубэна Фернандэса, а потым і яго самога апярэдзіў гоншчык Monster Energy Yamaha Factory MXGP Максім Рэно! Так, Гайсэр дапусціў памылку, але ж мог і не дапускаць.

А там ужо і Прада ззаду накочваў, і крыху пазней і ён пакінуў свайго канкурэнта ў спрэчцы за тытул ззаду. Гайсэру прыйшлося задаволіцца чацвёртай пазіцыяй, а Прада скончыў гонку трэцім. Да Рэно ён на дыстанцыю атакі падабрацца не здолеў, і Максім у выніку фінішаваў чацвёртым, ну а Сівер упершыню за доўгі час выйграў гонку.

Дзеля справядлівасці, пад канец першай гонкі ў Хорхе былі праблемы з яго маскай, што моцна яму замінала, затое фінальны заезд ён адразу пачаў хол-шотам. Аднак Гайсэр быў побач, і гэтым разам ён быў у пазіцыі таго, хто атакуе. Яго супрацьстаянне з Прада працягвалася ці не да апошніх кругоў, але скончылася на карысць дзейнага чэмпіёна, які выйграў і гонку, і Гран Пры Турцыі.

Трэцім у другой гонцы фінішаваў яшчэ адзін чэмпіён – заводскі гоншчык KTM Джэфры Херлінгс. Але нідэрландцу моцна не пашанцавала ў першым заездзе, у якім ён упаў і фінішаваў толькі дзясятым. Таму выніковае трэцяе месца на этапе дасталася ўсё ж такі Сіверу, які другую гонку скончыў на шостай пазіцыі.

Наўрад ці Херлінгс, які захоўвае ў чэмпіянаце трэцюю пазіцыю, са сваімі 857-мю баламі можа разлічваць на новы тытул. Прада да яго значна бліжэй – у яго 896 ачкоў, і да Гайсэра, які лідзіруе з 910-цю, яму рукой падаць. У заліку вытворцаў у сваю чаргу працягваецца дуэль Хонды, якая лідзіруе, маючы 927 балаў, і GASGAS, які ідзе другім і мае 896 балаў. Не ўсё скончана і для KTM, які ідзе трэцім з 869-цю ачкамі.

Перадапошні этап чэмпіянату свету па мотакросе – Гран Пры Кітая – пройдзе ў Шанхаі ўжо ў бліжэйшы ўік-энд. Дакладней, галоўныя гонкі адбудуцца ў панядзелак 16 верасня, але нашы блог і Тэлеграм-канал Honačnaja psichapatyja ўсё роўна будуць за імі сачыць і распавядуць вам пра іх галоўныя падзеі. Віримо в ЗСУ! Слава Україні! Жыве Беларусь!

Падтрымаць «Гоначную псіхапатыю»: Paysera: нумар рахунку IBAN LT98 3500 0100 1753 9264. Buy Me A Coffee. Не пераводзьце грошы, калі знаходзіцеся ў Беларусі! Гэта небяспечна для вас!