Два воіна, якія пакінулі сябе ў рынгу. Як было зроблена легендарнае фота Алі і Фрэйзера
Праз татальную варожасць да павагі.
Махамед Алі і Джо Фрэйзер сустракаліся ў рынгу тройчы: у 1971-м Джо стаў першым, хто пабіў Махамеда, а праз тры гады Алі ўзяў рэванш. 1 кастрычніка 1975 года адбылося іх трэцяе супрацьстаянне: 30-градусная спякота, шмат трэштоку і ўзаемнае збіццё.
У трэцяй сустрэчы Махамед перамог, але да адмовы кута апанента ад працягу дабраўся цяжка – паядынак доўжыўся 15 раундаў, а адрэзак з 6-га па 11-ы Фрэйзер правёў цудоўна. У адным з перапынкаў Алі казаў «здаецца, я паміраю», а за некалькі секунд да таго, як трэнер Фрэйзера зняў свайго байца праз тое, што той нічога не бачыў адным вокам, Махамед прасіў свой кут зняць з яго пальчаткі, бо ён занадта стаміўся.
«Трылер у Маніле» – так быў названы іх трэці паядынак – назаўжды застанецца ў гісторыі бокса, як адно з найвялікшых супрацьстаянняў. Алі і Фрэйзер доўга канфліктавалі за чатыры гады, што цягнулася іх трылогія, а Джо яшчэ доўга не мог дараваць экс-суперніку ўсе сказаныя на яго адрас словы.
Праз гады фатографу прыйшлося доўга ўгаворваць баксёраў на агульны фотасэт, і гэта атрымалася толькі праз абяцанне Фрэйзеру фатаграфавацца ў зале Джо ў Філадэльфіі. Фатограф Уолтар Лус разумеў, што фотасесія не будзе простай – Алі ў той час пакутаваў на хваробу Паркінсона, а ў Джо, як аказалася, да ўсіх астатніх хвароб дадаўся цукровы дыябет.
Пасля прыезду ў залу Уолтар паставіў крэсла ў рынгу для Махамеда, на што Фрэйзер сказаў: «А што наконт мяне? Хлопчык, я цяжка хаджу. Мае ногі забіваюць мяне».
Нягледзячы на старыя нягоды, баксёры былі шчаслівыя зноў убачыцца – смяяліся, весяліліся і жартавалі адзін з аднаго. Да канца здымак Лус перайшоў на сепію і папрасіў Махамеда і Джо проста паглядзець у аб'ектыў. Без падколаў і жартаў:
«Я зрабіў адзін кадр, потым іншы, і вось, нарэшце, атрымалася тое, што я жадаў: два стомленых воіна, якія пакінулі свае жыцці ў рынгу».
У 2011-м Алі прыехаў на пахаванне Фрэйзера, які памёр 7 лістапада ад раку печані: «Я заўсёды буду памятаць Джо, паважаць і захапляцца ім».
