Экс-чэмпіён UFC з Беларусі будзе біцца ў дзіўнай арганізацыі за сціплыя грошы – а самы вялікі ганарар яму дапамог атрымаць Трамп

У чэрвені мінулага года Андрэй Арлоўскі правёў апошні бой у UFC – саступіў славаку Марціну Будаю рашэннем суддзяў. Аднак кар'еру ўраджэнец Беларусі не завяршыў. Ужо ў ліпені зʼявіліся чуткі, што Арлоўскі можа правесці баксёрскі паядынак з Фёдарам Емяльяненкам. Байцы ўжо сустракаліся – у студзені 2009-га расіянін контратакаваў беларуса пасля няўдалай спробы апошняга выканаць удар каленам у галаву ў скачку. Емяльяненка ўхіліўся і паспеў выкінуць правы крос, трапіўшы прама ў сківіцу апаненту. Арлоўскі, здаецца, прызямляўся ўжо без прытомнасці:

«Барбі» ў напаўпрытомным стане, бэкфіст для Шакуты. 6 эпічных накаўтаў, у якіх пабывалі байцы з Беларусі

Цікава, што той паядынак праходзіў у прамоўшне Affliction Entertainment, доля якога належала Дональду Трампу. Сама арганізацыя праіснавала крыху больш за год, але Арлоўскі ў ёй паспеў правесці два баі – акрамя эпічнай паразы ад Емяльяненкі была яшчэ перамога накаўтам у ліпені 2008-га над амерыканцам Бэнам Ротвэлам. За два баі ў арганізацыі Трампа «Пітбуль» зарабіў вялізныя па тых часах 2,25 мільёны долараў: 750 тысяч долараў Андрэй выручыў за перамогу над Ротвелам, а за пройгрыш Емяльяненку ўвогуле атрымаў 1,5 мільёна. Пры гэтым расіяніну пасля перамогі заплацілі ўсяго 300 тысяч. Затое у Емяльянінкі ёсць вось такое фота – Арлоўскі мог стаяць на яго месцы.

Для параўнання – самы вялікі ганарар у UFC Арлоўскі зарабіў пасля перамогі над амерыканцам Джарэдам Вандэрай у лютым 2022-га – 381 тысячу долараў.

Цяжка сказаць, як на гэта паўплываў самы вялікі ў кар'еры ганарар, але Арлоўскі даўно топіць за Трампа. Калі той у лістападзе 2016-га ўпершыню выйграў выбары на пост прэзідэнта ЗША, баец напісаў: «Божа, дабраславі Амерыку. Усе шчыліны, якія адпісаліся ад мяне і пісалі непрыемныя каментары, падобна, я меў рацыю. Так што цяпер вы, сукі, можаце пацалаваць мой беларускі азадак».

Але вяртаемся да кар'еры Арлоўскага. Баксёрскі паядынак з Емяльянекам хацеў зладзіць прэзідэнт расійскага прамоўшэна Fight Nights Каміл Гаджыеў. Аднак пасля размовы з беларусам той заявіў, што арганізацыя івента разам з ганарарамі вымагае 5 мільёнаў долараў – і гэтая сума аказалася непадымнай.

Але яшчэ да слоў Гаджыева Арлоўскі падпісаў кантракт з Global Fight League – новым прамоўшэнам па змешаных адзінаборствах, які стварыў канадскі бізнесмен Дарэн Оўэн. Ліга сабрала ветэранаў ММА рознага ўзроўню і плануе ім плаціць шалёныя ганарары: напрыклад, цяжкавагавікі, у катэгорыю якіх трапляе Арлоўскі, нібыта могуць атрымаць і 1,4 мільёна долараў за бой.

GFL плануе праводзіць спаборніцтвы ў фармаце каманднай лігі. 120 байцоў ростара падзялілі на шэсць каманд з шасці розных гарадоў па 20 чалавек у кожнай (па два байцы на вагавую катэгорыю). Па выніках баёў будуць налічвацца пункты: чатыры – датэрміновая перамога, тры – перамога рашэннем, два – нічыя, адзін бал – за паражэнне рашэннем, нуль – за датэрміновае паражэнне.

Плануецца, што турніры будуць ісці з красавіка па жнівень гэтага года, усяго запланавана 15 мерапрыемстваў. У паўфінал, які пройдзе ў верасні, выйдуць чатыры найлепшыя каманды, а ў лістападзе адбудзецца фінал. Арлоўскі будзе прадстаўляць Лос-Анджэлес.

GFL у сваім Instagram ужо анансавала некаторыя паядынкі. Праўда, ні даты, ні часу, ні месца ў афішах няма. Няма на іх і Арлоўскага. Затое баец-ветэран даволі нечакана з'явіўся на афішах іншай арганізацыі – Dirty Boxing. Вось там ужо ёсць і дзень, і супернік.

Dirty Boxing (DBХ) – малады прамоўшэн, які з'явіўся ў 2024-м. Яго стваральнікі – прадпрымальнік Джош Маклін і былы баец UFC Майк Пэры. У арганізацыі даволі арыгінальны слоган: Itʼs time to get dirty, што перакладаецца як «Час стаць брудным». Баі ў DBX праходзяць па змяшаных правілах ММА і класічнага бокса: усё пабудавана на ўдарах рукамі (кулакамі, локцямі, далонямі), дазволена дабіваць апанента, калі той апынуўся на зямлі (Ground and Pound). Удзельнікі б'юцца ў пальчатках са змешаных адзінаборстваў, раўнды (тры ў звычайным паядынку і пяць у тытульным) доўжацца тры хвіліны, а яшчэ бой праходзіць на паменшаным рынгу, што па задумцы не дазволіць байцам уцякаць адзін ад аднаго.

У лістападзе 2024-га прайшоў першы івэнт DBX. Галоўнай падзеяй вечара быў бой срэбнага прызёра Алімпіяды-2000 па барацьбе і экс-байца UFC кубінца Йоэля Рамэра і Дуэйна Крэспа – чэмпіёна «аплявушных баёў» у амерыканскім прамоўшэне Power Slap, які належыць генеральнаму дырэктару UFC Дэйне Уайту. Рамэра атрымаў перамогу накаўтам ужо ў першым раўндзе. Наступны бой кубінец правядзе супраць былога байца Bellator MMA Раса Хілтана ў галоўнай падзеі DBХ 22 сакавіка 2025 года. Там жа і выступіць Арлоўскі. Супернікам беларуса стане 40-гадовы Тэрэнс Ходжэс. У амерыканца больш сціплая байцоўская гісторыя ў параўнанні з Арлоўскім (34-24 у UFC) – дзве перамогі і сем паражэнняў у розных прамоўшэнах ММА. Вядома, што ён таксама выступаў у боксе, тайскім боксе і кікбоксінгу.

Які ганарар арганізатары абяцалі Арлоўскаму – невядома, але заўважым, што ў лістападаўскім івэнце прызавы фонд бою Рамэра і Крэспа складаў усяго 25 тысяч долараў.