Цылінская сабрала ў апекуны веласпорту «цвет рэжыму»: ліквідатара Бабарыкi і TUT.BY, «генерала» на каньках, «сына» Лукашэнкі
Плюс галоўны прапагандыст і знаўца англійскай са слоўнікам.
15 студзеня ў «НАК» Лукашэнкi мянялі склад выканкама – з яго выбыў, у прыватнасці, рэжымнік Дзмiтрый Баскаў, якога чатыры гады не прызнаваў Міжнародны алімпійскі камітэт. Зрэшты, большасць членаў засталася на месцы – у тым ліку кіраўнік беларускага веласпорту Наталля Цылінская. Сама яна выступала на трэку, дзе з-за санкцыяў да Беларусі ў адказ на вайну ва Украіне спартсменаў усё яшчэ не дапускаюць нават у нейтральным статусе – Цылінская на гэтым фоне кажа, што «спартсмены павінныя быць мірнай палітыкай», пры гэтым падтрымлівае рэжым-суагрэсар.
Але яшчэ цікавей, якія людзі акружаюць Цылінскую ў яе федэрацыі. Напрыклад, намеснікам шмат гадоў застаецца Мікалай Ладуцька – былы кіраўнік выканкама Лукашэнкі па Мінску, якога пасылалі «паднімаць» мінскі мотавелазавод, але ў 2022-м знялі пасля выдачы кітайскага прадукта за «беларускі матацыкл».
У выканкаме велафедэрацыі лiчацца такія персанажы, як удзельнік рэжымных аўтапрабегаў Дзмітрый Талкачоў і Яўген Шабуня, якога выставілі з інспектараў АБФФ.
Але самы смак – гэта апякунскi савет федэрацыі. Мабыць, ні ў адным іншым вiдзе такім бачным рэжымным складам пахваліцца не могуць. Раскажам, кім атачыла сябе Цылінская, якая сама таксама ўваходзіць у савет.
Дзмiтрый Баскаў
Хакейны трэнер Лукашэнкі – уплывовы чалавек у рэжымнай сістэме: і сам стаў багатым «бізнесменам», хоць яшчэ ў 2016-м браў у доўг на куплю кватэры, і іншых можа прасунуць: пабыў вось побач з Дзмітрыем Саксонавым, які адседзеў за махлярства, – і апошняму дазвалялі перакрываць цэнтры беларускіх гарадоў для роліка з дрыфт-машынамі.
Шмат сэнсу казаць пра Баскава няма – мы і так ведаем пра яго больш, чым хацелася б. Да гэтага часу не здарылася ніякіх наступстваў ад датычнасці да гібелі Рамана Бандарэнкі, усё яшчэ пастаянна прысутнічае на нейкіх хакейных мерапрыемствах, нягледзячы на пяцігадовы бан ад ІІХФ – вось нядаўна заходзіў з мінскім «Дынама» на «датэрміновыя выбары», на якіх быў даверанай асобай Лукашэнкі (а пасля прадказальна ўсхваліў «перамогу» дыктатара).
Адзначым хіба, што ў пераліку пасад Баскава як члена «парламента» Лукашэнкі на сайце органа няма федэрацыі веласпорту – затое адзначаны ўплыў на каратэ, якім «руліць» іншы рэжымнік Аляксей Багданаў (праўда, з нядаўняга часу гэта цяжка – Багданава зрабілі «паслом» Лукашэнкі ў Казахстане), і не абноўленыя даныя па сыходзе з выканкама «НАК».
Іван Эйсмант
Кіраўнік прапагандысцкай Белтэлерадыёкампаніі таксама быў даверанай асобай Лукашэнкі на «выбарах». Гэта не замінала яму ў студзені 2025-га асабіста працягваць несці рэжымныя наратывы з экрана – хаця гэта наўпрост забаронена нават лукашэнкаўскім «выбарчым кодэксам», і пасля скаргі Эйсманта ўсё ж прыбралі на некалькі эфіраў. Таксама ў канцы 2024-га рэжымнік узяўся за напісанне сцэнарыя, вядзенне і закадравае агучванне цыклу праграм «Час выбраў нас», дзе ляпіў з Лукашэнкі «лідара» і падтрымліваў вайну, якая праводзіцца Расіяй ва Украіне, а заадно з ужываннем адкрытай хлусні дэманізаваў прэзідэнцкі перыяд Уладзіміра Зяленскага. За ўсё гэта Эйсмант атрымаў дадатковыя грошы з дзяржбюджэту – сумарна больш за 6 тысяч долараў.
Таксама старшыня БТРК, які разам з кампаніяй знаходзіцца пад санкцыямі, з пачатку 2024-га стаў намеснікам старшыні «савета дэпутатаў» Лукашэнкі па Мінску.
Арцём Цуран
Былы фізрук шмат гадоў працаваў «інструктарам па спартыўна-масавай частцы» на заводзе, але потым неяк трапіў у выканкам Лукашэнкі па Фрунзенскім раёне Мінска – а ў пачатку 2019-га стаў намеснікам старшыні ў выканкаме Лукашэнкі па ўсім Мінску і па пасадзе каментаваў Еўрагульні, аднойчы заявіўшы, што на стадыёне «Дынама» нібыта будуць раптоўна спаборнічаць гімнасткі. Пасля «выбараў» 2020-га Цуран змагаўся з «уплывам дэструктыўна настроеных грамадзян» – вылучыў у Мінску 44 «асяродкі», дзе трэба было «сканцэнтраваць намаганні» рэжыму, і патрабаваў сабраць «народныя дружыны», для чаго звяртаўся ў федэрацыі па адзінаборствах.
Таксама з канца 2019-га па пачатак 2021-га Цуран быў членам выканкаму «НАК» Лукашэнкі, дзе яму сярод іншага прапісалі такое вось раскошнае ўменне.
У пачатку 2024-га Цуран страціў пасаду намесніка старшыні выканкама Лукашэнкі па Мінску, стаўшы начальнікам Эйсманта ў мясцовым «савеце дэпутатаў». На новай пасадзе рэжымнік вызначыўся руціннай для свайго класа рыторыкай – фэйкі пра Украіну, апавяданні, што беларускія эмігранты нібыта вяртаюцца на Радзіму з Еўропы, бо там «да падлеткаў узнікаюць пытанні з ідэнтыфікацыяй полу», а лукашэнкаўскі рэжым – маўляў, «донар стабільнасці».
Дзмітрый Карзюк
Зрабіў сабе кар’еру ў рэжымным «ДАІ» – а дапамог у гэтым хакей: у сістэме «МУС» шукалі гульцоў у аматарскую каманду сыноў Лукашэнкі, і Карзюк падышоў. А потым ён пасябраваў з Віктарам Лукашэнкам на глебе захаплення матацыкламі – і пайшоў у гару, і ніякія фэйлы на пасадах гэтага ўжо не спынялі. Тым больш Лукашэнка-старэйшы ацаніў відэа пасля выбараў у 2010-м – камеры злавілі, як Карзюк у адзіночку спрабаваў разагнаць пратэсты пасля «выбараў».
З 2008-га Карзюк узначальваў «ДАІ» па Мiнску, з 2016-га – ужо па ўсёй краіне. У 2020-м супрацоўнікі «інспекцыі» праявілі крайнюю жорсткасць да новай хвалі пратэстаў – пэўна, ацаніўшы гэта, Карзюка ў канцы 2021-га павысілі да намкіраўніка «МУС», прычым у званні «палкоўніка», хоць гэта «генеральская» пасада. Адразу пасля гэтага на яго наклалі санкцыі ЗША. Таксама аказалася, што на «сілавіка» запісана нерухомасці на сотні тысяч долараў – а таўнхаўс ў 261 «квадрат» у прэстыжным мiнскім раёне яму прадалі за 300 тысяч долараў замест рынкавых 400 тысяч.
Карзюк застаецца на бягучай пасадзе ў «МУС» – за ўвесь час у ёй нічым асаблівым публічна не адзначыўся, хіба што ўсё ж атрымаў пагоны «генерала» у 2023-м. Таксама «сілавік» захоўвае капітанскую нашыўку ў «Бастыёне-2» – аматарскай хакейнай камандзе Віктара Лукашэнкі. У гэтым сезоне Д3 чэмпіянату Мінска правёў 10 гульняў і набраў 9 (0+9) ачкоў.
Ігар Маршалаў
Маршалаў злева
Гэты чалавек амаль усё свядомае жыццё працаваў у «фінансавай міліцыі» – а ў 2013-м узначаліў дэпартамент фінансавых расследаванняў «КДК» Лукашэнкi. Толькі ў самім «ДФР» хапала карупцыі – у пачатку 2024-га наогул вынеслі на публіку схему, калі ў Мiнску «высокія чыны» дэпартамента праз падначаленых выстаўлялі бізнесменам ультыматум: ці хабар у дзясяткі тысяч долараў, ці знаходжанне таго, да чаго можна прычапіцца.
Але што яшчэ больш важна, «ДФР» быў зручным інструментам расправы з непажаданымі: не падабаецца рэжыму чалавек ці кампанія па палітычных матывах – супрацоўнікі дэпартамента «знаходзяць» фінансавыя парушэнні. Гэта падначаленыя Маршалава ў 2020-м арыштавалі шэраг кіраўнікоў «Белгазпрамбанка» – пасля таго, як бос банка Віктар Бабарыка рызыкнуў кінуць Лукашэнку выклік, пайшоўшы на «выбары». У траўні 2021-га Маршалаў асабіста запатрабаваў выключыць з «Парку высокіх тэхналогій» юрыдычную асобу партала TUT.BY, а неўзабаве «ДФР» прыйшоў у офісы кампаніі, якая была разгромленая – партал быў найбуйнейшым у Беларусі з тых, што сумленна асвятлялі сітуацыю ў краіне. Неўзабаве так жа быў разгромлены праваабарончы цэнтр «Вясна», чый кіраўнік Алесь Бяляцкі ўжо з-за кратаў атрымаў Нобелеўскую прэмію міру. Бабарыка і першыя асобы TUT.BY таксама сядзяць у зняволенні.
А вось Маршалаў, нягледзячы на карупцыю падначаленых, – на волі, хоць і пад санкцыямі ЕС і ЗША. Толькі ў канцы 2023-га быў зняты з «ДФР» і адпраўлены амбасадарам Лукашэнкі ў Зімбабвэ – важную для рэжыму краіну: туды пастаўлялі тэхніку, там здабывалі золата.
Дзмітрый Пантус
З чэрвеня 2020-га ўзначальвае лукашэнкаўскі «ваенна-прамысловы камітэт», больш вядомы як «дзяржкамваенпрам». Змяніў на пасадзе Пантус Рамана Галоўчанку, які пайшоў у лукашэнкаўскія «прэм“ер-міністры». «Дзяржкамваенпрам» жа шмат гадоў вядомы сваім каламутным продажам зброі ў іншыя краіны – замяшаная ў гэтым была і кампанія Sohra, праз якую «кашалёк Лукашэнкі» Аляксандр Зайцаў заходзіў у брэсцкае «Дынама». Паводле інсайдаў, так сярод іншага так дапамагалі «адмываць» грошы арабскім шэйхам (Пантус, дарэчы, застаецца ў рэжыма «замацаванай службовай асобай» за ААЭ).
У пачатку 2025-га аб'яднанне былых «сілавікоў» Лукашэнкі BELPOL раскрыла, што прадпрыемствы «дзяржкамваенпрама» дзясяткамі тысяч у месяц вырабляюць складаныя часткі для снарадаў, якімі Расія тэрарызуе Украіну. Па звестках BELPOL, Пантус наогул хацеў зарабіць на поўнай вытворчасці снарадаў у Беларусі, для гэтага пісаў у Расію лісты «з запэўненнем у высокай павазе» і просьбамі паставіць узрывальнікі і выбухоўку, але расійскі бок прадказальна палічыў гэтую схему нявыгаднай для сябе.
Зразумела, з прычыны датычнасці да вайны Пантус знаходзіцца пад санкцыямі ЕС, ЗША і іншых краін.
Таццяна Каліціна
Былая школьная настаўніца з часам пайшла ў чыноўнікі, а з красавіка 2020-га ўзначальвае дзяржпрадпрыемства «Мінскрэклама». Менавіта яно адказвае за вырвівочныя банеры да розных рэжымных дат у сталіцы. Таксама Каліціна ўжо год як падначаленая Цурана ў «савеце дэпутатаў» па Мiнску, дзе рулiць профільнай для сябе камісіяй «па кіраванні камунальнай уласнасцю і рэкламе».
У дзяржСМІ Каліціна з’яўляецца не так часта, але ў пачатку 2021-га як след паліла «вады» на рэжымны млын – распавядала «страшылкі» пра 1990-я, усхваляючы рэжым, і патрабавала ў моладзі «не абурацца, што ты скончыў ВНУ і «за чыстыя капейкі» вымушаны адпрацоўваць размеркаванне», а замест гэтага абвінаваціла студэнтаў, што яны нібыта патуральніцкi ставяцца да вучобы, таму і «размяркоўваюцца, куды бяруць» (насамрэч рэжым масава забараняе сыходзіць да прыватнікаў з адэкватным заробкам, патрабуючы два гады правесці ў дзяржканторах).
Руслан Аляхно
Рэжымны спявак у дзяцінстве займаўся каратэ, а не веласпортам. Але ў апекунах у апошняга хаця б не проста лічыцца, а рэгулярна выступае на розных мерапрыемствах тыпу велапарадаў, якія арганізуе федэрацыя Цылінскай. Але больш вядомы Аляхно выступамі на акупаваных Расіяй тэрыторыях Украіны – сам ганарліва заяўляе, што яшчэ ў 2014-м спяваў у анэксаваным Крыме, за што да яго ўвялі санкцыі ў Еўропе (хоць у спісах ЕС прозвішча не знайсці), а пасля пачатку вайны ва Украіне дзясятак разоў быў на падкантрольных Расiі кропках (часцей у «ДНР», але паспеў нават у Херсон, які расiяне ўтрымлівалі толькі некалькі месяцаў).
Відавочная і любоў Аляхно да лукашызму. Пасля «выбараў» у 2020-м спявак паўдзельнічаў у запісе песні «Любімую не аддаюць» (раней дыктатар так сказаў пра Беларусь, даўшы зразумець, што не сыдзе незалежна ад волі народа), у канцы 2020-га разам з Баскавым і Арынай Сабаленка ўдзельнічаў у навагоднім звароце Лукашэнкі. Потым рэгулярна выступаў у рэжымных канцэртах – і атрымаў прызнанне ад сям’і Лукашэнкі: у 2021-м прысвоілі «заслужанага артыста», а калі нявестка дыктатара Ганна Селук пачала пісаць песні, яны з’явіліся ў рэпертуары Аляхно, чым той хвалiўся на расійскім ТБ. Летам 2024-га спявак выконваў рэжымны гімн на футбольным матчы Беларусь – Расія, не здолеўшы вымавіць «дз» у слове «Радзіма».
Пазіцыя спевака не мяняецца – у канцы 2024-га ён заявіў, што Лукашэнка для яго «наш бацька», а перад «выбарамі» ў 2025-м праспяваў на «Мiнск-Арэне», адкуль для канцэрта з прысутнасцю дыктатара перанеслі хатнюю серыю матчаў хакейнага «Дынама» (якому ад ускладненага з-за гэтага графіка ўжо нязручна). А яшчэ ёсць пікантная дэталь – пра «сустрэчы» з Аляхно заяўляла жонка іншага «заслужанага» рэжымніка, шматгадовага кіраўніка «АМАП» Лукашэнкі па Мінску Дзмітрыя Балабы.
Дзмітрый Ракусаў
Сын былога кіраўніка «СК» Лукашэнкі па Магілёўскай вобласці сам 10 гадоў быў «сілавіком», але потым сышоў – а ў 2010-х выявіўся ў зайцаўскай Sohra. Калі «кашалёк Лукашэнкi» ўзяў у рукі брэсцкае «Дынама», Ракусава прыцягнулі да арганізацыі матчдэяў, а з 2019-га сталі называць крэатыўным дырэктарам клуба. У адным з інтэрв’ю «функцыянер» казаў, што за досведам ездзіў у ЗША – і там вельмі ўразіўся, што гімн спяваюць не толькі музыкі, але і «звычайныя людзі, якія чагосьці дабіліся ў гэтым жыцці». Такім, мабыць, Ракусаў палічыў сябе – і неўзабаве праспяваў рэжымны гімн на адным з матчаў «Дынама».
Як аказалася, гэта быў толькі пачатак яго сувязі з музыкай. У 2021-м з’явілася ТАА «Першая прадзюсерская кампанія», створанае экс-маркетолагам «Мінска» і прарэжымным спеваком Сяргеем Мінскім. Фірма атрымала дамову з дзяржТБ на «прасоўванне» фіналістаў праекта «Фактор.by», дзе быццам бы «адкрывалі новыя імёны» спевакоў, але дэ-факта яны потым у песнях праслаўлялі рэжым. Неўзабаве «ўзятыя пад крыло» «ППК» артысты сталі ў тым ліку выконваць трэкі Сялук. Ракусаў жа апынуўся кiраўнiком кампаніі – як і чаму, незразумела. Апроч гэтага, у 2022-м у ягоных сацыяльных сетках з’явіўся здымак з Віктарам Лукашэнкам, Карзюком і матацыкламі – магчыма, разгадка крыецца недзе тут.
У 2024-м Ракусаў посціў фота з паездкі ў ЕС і з выставы ад велаклуба «Мінск».
Ігар Іванцоў
Пра гэтага чалавека вядома няшмат. Ён быў намеснікам дырэктара па бяспецы, а потым стаў гендырэктарам ЗАТ «Юніфуд» – юрасобы сеткі прадуктовых крам «Алмі». Мужчыну з рэдкім імем па бацьку Стахіевіч прызнавалі «Чалавекам года-2018» у Пінску, Іванцоў у 2022-м падпісаў у ліку кіраўнікоў іншых сетак зніжку ў 10% на некаторыя тавары для пенсіянераў, шматдзетных і атрымальнікаў сацдапамогі (яе з тых часоў пастаянна падаўжаюць, нягледзячы на фактычную невыгоднасць для шматлікіх пакупнікоў з-за дадатковых умоў).
У пачатку 2023-га Лукашэнка раптам абурыўся, што заробак у кіраўнікоў гандлёвых сетак нашмат большы, чым у радавых супрацоўнікаў – маўляў, трэба прыводзіць, як у дзяржпрамысловасці, да суадносін максімум 8:1. У дзяржСМІ тут жа апублікавалі даныя па канкрэтных сетках – калі верыць тым звесткам, кіраўнік «Юніфуда», гэта значыць Іванцоў, атрымліваў 4,26 тысячы долараў у месяц, у той час як прадавец і касір нібыта мелі амаль у 14 разоў менш. Трэба адзначыць, што ў «Юніфудзе» з раскрытых прапагандай кампаній была самая маленькая зарплата для кіраўніка.
Пра Іванцова ў апошні час нічога не чуваць, а ў «Юніфуда» праблемы - крамы SPAR, якія кампанiя таксама спрабавала развіваць, зачыніліся, а некаторыя «Алмі» збіраліся здаваць у арэнду іншым сеткам, таму што самі не цягнулі.
Аляксей Іваноў
Уваходзіць і ў выканкам федэрацыі, а наогул у ёй даўно – яшчэ ў 2000-х быў дырэктарам па маркетынгу і рэкламе, потым выканаўчым дырэктарам. А ў 2013-м у Беларусі стварылі першы прафесійны велаклуб «Мінск», куды Іванова паставілі генменеджарам. Цяпер ён ужо некалькі гадоў у клубе галоўны – займае пасаду дырэктара.
У пачатку 2021-га Іваноў запомніўся ганарлівай заявай, што «Еўрапейскі саюз веласіпедыстаў аднагалосна аддаў нам чэмпіянат Еўропы на трэку, нават пасля санкцый МАК па палітычных матывах» да «НАК» Лукашэнкі. Санкцыі былі сапраўды за палітычны ціск на спартсменаў, а Іваноў забыўся, што рэжым непрадказальны: у траўні таго ж года прымусова пасадзіў у Мiнску рэйс Афіны – Вільнюс, каб кінуць за краты двух чалавек, атрымаў у адказ татальны авіябан, і пасля гэтага ЧЕ з-за нязручнасцяў лагістыкі перанеслі.
Пасля пачатку вайны ва Украіне з-за санкцый у адказ «Мінск» пазбавіўся еўрапейскіх гонак. Цяпер клуб, у якім, дарэчы, да пачатку 2024-га выступаў муж біятланісткі Ганны Солы Станіслаў Бажкоў, удзельнічае ў асноўным у расійскіх гонках. У 2025-м, напрыклад, падпісантка за рэжым Ганна Церах паспела выйграць тры гонкі на Кубку Расіі па велатрэку. А летам 2024-га шашэйны «Тур Расіі» ўзяў спартсмен «Мінска» Мамыр Сташ – расіянін чаркескага паходжання.
Іншыя пасты карыстальніка
