Сёрфінг на АГ – 🔥 Выдалі найлепшае фота Алімпіяды, спаборнічаюць на Таіці, жывуць на лайнеры

Пакуль у Парыжы ўсе сочаць за асноўнымі відамі спорту на Алімпіядзе, у тысячах кіламетраў ад яго праходзяць адны з самых недаацэненых алімпійскіх спаборніцтваў – каля ўзбярэжжа Тэахупаа разыгрываюцца медалі па сёрфінгу.

Гэты турнір прымае Таіці (Французская Палінезія). Адлегласць у 15 727 кіламетраў – рэкорд, яшчэ ні разу медальныя спаборніцтвы не праходзілі так далёка ад месца правядзення Алімпіяды. Папярэдні належаў Стакгольму, калі Алімпіяду-1956 прымаў Мельбурн, але праз строгія аўстралійскія правілы для каранціну жывёл, якія прыбылі з-за мяжы, раўнды коннага спорту перамясцілі ў Швецыю (15 586 кіламетраў, то бок на 141 менш).

Прычына пераносу ў гэтым годзе – жаданне арганізатараў правесці сёрфінг на знакамітых масіўных хвалях на востраве. Яны тэарэтычна могуць дасягаць вышыні 12-15 метраў. А яшчэ алімпійскі камітэт заявіў, што «хоча асвятліць французскія тэрыторыі па ўсім свеце, а не толькі саму краіну».

Само месца – неверагоднай прыгажосці.

Яшчэ больш уражвае алімпійскі пасёлак атлетаў – гэта лайнер: 230 пасажыраў у больш як 100 каютах, 8 палуб, спа-цэнтр, трэнавальная зала. Ён стаіць на якары ля берага, а спартсмены перамяшчаюцца на невялікіх лодках.

Фота знутры:

Алімпійскі сёрфінг ужо ў разгары – і нават падыходзіць да канца. Самы яркі пакуль хайлайт адтуль – алімпійскі рэкорд бразільца Габрыэла Медыны. У першы жа дзень ён атрымаў ад суддзяў адзнаку 9.9 за свой заплыў, што раней не ўдавалася нікому.

Ён жа падарыў, напэўна, найлепшае фота гэтай Алімпіяды – прынамсі, так гэта апісаў фатограф, які яго зрабіў. Некалькі ракурсаў:

Ютуб-канал Алімпіяды публікуе відэа з найлепшымі момантамі кожнага раунда.

Атмасферу добра перадаюць здымкі – выглядае крута, асабліва з хвалямі на Таіці.

А вось такія кадры пад вадой:

Рэкардсмен свету Гарэт Макнамара так пракаментаваў правядзенне Алімпіяды на Таіці:

💬 «Гэта адны з самых прыгожых і небяспечных хваляў у свеце. Гэта проста «жыццё ці смерць» ад пачатку да канца. Востры, як брытва, каралавы рыф знаходзіцца ўсяго ў некалькіх сантыметрах пад вамі, калі вы падаеце.

Гэта непадобна да іншых хваль. Звычайна гэтыя вялізныя хвалі можна ўбачыць на гарызонце. А тут... Увесь акіян рухаецца наперад. Ты не бачыш, як ідуць чэргі. Як толькі хвалі набліжаюцца да рыфа, усё дно выпадае».

Нагадаем, што сёрфінг – малады алімпійскі від спорту, дэбют адбыўся толькі на мінулых Гульнях у Токіо ў 2021 годзе.

Фота: Jerome Brouillet/AFP, Morgan Maassen/Olympics, Gregory Bull/AP Photo, AJ McCord, Aranui Cruises, Newscom/Alamy Live News