Федэрацыя фехтавання Украіны прыняла рашэнне не выходзіць на паядынкі з расійскімі і беларускімі спартсменамі
Прэзідыум Федэрацыі фехтавання Украіны правёў паседжанне, на якім вырашылі, што ўкраінскія спартоўцы не будуць выходзіць на паядынкі з расійскімі і беларускімі спартсменамі.
Раней Міжнародная федэрацыя фехтавання дазволіла сапернічаць расіянам і беларусам на турнірах. Рашэнне набудзе моц у другой палове красавіка 2023 года.
«Было прынята рашэнне не толькі не выходзіць на паядынкі на спаборніцтвах любых узроўняў з непасрэдна расійскімі і беларускімі спартсменамі, але і нашым спартсменам, трэнерам, суддзям не ўдзельнічаць у спаборніцтвах, у якіх прымуць удзел расійскія ці беларускія спартсмены з актыўным прыцягненнем да гэтага спартсменаў з іншых краін.
Прэзідыумам прынята рашэнне стварыць рабочую групу, якая вызначыць канкрэтны план і змест актыўных дзеянняў украінскіх спартсменаў і трэнераў на бліжэйшых спаборніцтвах, на якіх будзе зроблена спроба вярнуць расійскіх і беларускіх спартсменаў.
Акрамя таго, таксама былі абмеркаваны канкрэтныя дзеянні, накіраваныя на абскарджанне незаконнага і ганебнага рашэння Кангрэса Міжнароднай федэрацыі фехтавання (FIE) ад 10 сакавіка 2023 года аб вяртанні прадстаўнікоў РФ і РБ у міжнародныя спаборніцтвы пад эгідай FIE», – гаворыцца ў афіцыйнай заяве Федэрацыі фехтавання.
