Украінская фігурыстка Сярова: «Сёння мой 16-ы дзень нараджэння – я год не бачыла свайго тату»
Украінская фігурыстка Віялета Сярова падзялілася думкамі пра гадавіну поўнамаштабнай вайны ва Украіне.
«Сёння 24 лютага і я хачу вам сёе-тое сказаць. Роўна год таму ў маёй краіне пачалася вайна. Роўна год мінуў, як гінуць нашы людзі. Гэтая вайна забрала зашмат жыццяў, зашмат сем'яў… Яны ніколі не вернуцца.
Мільёны людзей зʼехалі ў іншыя краіны. Я ўжо год жыву не ў сваёй краіне. Я хачу паехаць дадому. Я ведаю, кожны ўкраінец жадае дадому.
Калі ласка, мір. Адкрыйце вочы і вушы. Спыніце ###### [даўбаную] Расію. Спыніце Пуціна.
Сёння 24 лютага, мой 16-ты дзень нараджэння. Я год не бачыла свайго бацьку. Дапамажыце мне. Дапамажыце украінцам. Дапамажыце Украіне.
Спыніце вайну. Слава Украіне», – сказала Сярова.
Нагадаем, з 24 лютага 2022 году Расія працягвае вайну ва Украіне з выкарыстаннем тэрыторыі Беларусі.
