УЕФА правяла сустрэчу з прадстаўнікамі Суперлігі
Сёння, 8 лістапада, у Ньёне сустрэліся афіцыйныя асобы УЕФА, прадстаўнікі еўрапейскіх клубаў, ліг і члены A22 Sports (кампанія, якая займаецца развіццём Суперлігі).
Па выніках сустрэчы на афіцыйным сайце УЕФА была апублікавана заява:
«Вышэйшае кіраўніцтва УЕФА на чале з прэзідэнтам Аляксандрам Чаферынам і высокапастаўленымі прадстаўнікамі нацыянальных ліг, клубаў, гульцоў і заўзятараў разам падкрэслілі, што апазіцыя самаабвешчанай Суперлігі сёння застаецца пераважнай, як і ў красавіку 2021 года.
Згодна з прынцыпамі адзінства еўрапейскага футбола, УЕФА і партнёры падчас сённяшняга абмеркавання ў чарговы раз адпрэчылі ідэю стварэння Суперлігі.
Удзельнікі сустрэчы са здзіўленнем успрынялі заяву генеральнага дырэктара A22 Sports, што яго кампанія ніяк не прадстаўляе ніякія клубы, улічваючы тры клубы, якія да гэтага часу працягваюць адкрыта падтрымліваць праект Суперлігі.
УЕФА і партнёры па-ранейшаму верныя прынцыпам еўрапейскага футбола, якія заснаваныя на адкрытасці, салідарнасці і мерытакратыі і ставяць спартовыя прынцыпы і грамадскія інтарэсы вышэй за прывілеі і асабістую выгаду».
На сустрэчы прысутнічалі прэзідэнт «ПСЖ» Насер Аль-Хелайфі і генеральны дырэктар «Баварыі» Олівер Кан - прадстаўнікі топ-клубаў, якія не ўвайшлі ў склад Суперлігі 19 красавіка 2021 года.
Тры клубы, якія працягваюць падтрымліваць ідэю стварэння еўрапейскай Суперлігі – «Рэал», «Барселона» і «Ювентус».
