Міліч Чурчыч: «Цяжкая гульня з «Мінскам», бо выпусцілі тых, хто менш гуляў. І паспрабавалі гульцоў з петрыкаўскага «Шахцёра»
Выконваючы абавязкі галоўнага трэнера «Шахцёра» Міліч Чурчыч падзяліўся меркаваннем пра матч 1/8 фіналу Кубка Беларусі ў «Мінска» (2:1).
– Цяжкая была гульня, таму што мы вырашылі змяніць наш склад і выпусціць футбалістаў, якія менш знаходзіліся на полі ў матчах чэмпіянату. У тым ліку, паспрабавалі некаторых хлопцаў з петрыкаўскага «Шахцёра».
Я магу быць задаволены, таму што мы забілі два галы і стварылі яшчэ некалькі небяспечных момантаў. Пры гэтым супернік таксама быў добры, а яшчэ ўскладнялі гульню ўмовы – і пагодныя, і пераход з натуральнага поля на штучнае. Павінен сказаць яшчэ раз дзякуй хлопцам і за гэты матч, і за ўвесь год. Мы прарабілі сур'ёзную працу, сталі чэмпіёнамі і прайшлі ў чвэрцьфінал Кубка.
Таксама дзякуй нашым заўзятарам, якія прыйшлі падтрымаць, нягледзячы на холад.
– Такі выбар складу ўсё ж такі даваў больш магчымасцяў саперніку. Мабыць, нявыхад у наступны раунд не стаў бы для вас праблемай?
– У маім распараджэнні ёсць 25 футбалістаў, і я не баюся паставіць кагосьці з іх, у тым ліку маладых хлопцаў. Той жа Кавалевіч – наш малады талент - сёння добра працаваў на полі і забіў прыгожы гол. І я спадзяюся, у мяне ніколі не будзе праблем, таму што я давяраю сваім гульцам. Калі б мы прайгралі, гэта, вядома, была б мая віна. Але гэтыя хлопцы, якія сёння ўпершыню гулялі разам, правялі добры матч: добра рухаліся, выконвалі дысцыпліну, дзейнічалі кампактна. Таму яшчэ раз усім дзякуй, – сказаў Чурчыч.
