Ігар Даўгяла: «Якасных легіянераў у Беларусі выступае менш. Узровень футбола, безумоўна, знізіўся»
Брамнiк «Нафтана» Ігар Даўгяла падзяліўся меркаваннем аб беларускім футболе.
– Засумавалі за два гады па вышэйшай лізе?
– Ды ў Беларусі любы футбаліст павінен імкнуцца да таго, каб гуляць у прафесійнай камандзе. За «вышкай» гэтыя два сезоны сачыў, але збольшага за вынікамі, хаця некаторыя матчы ўдавалася паглядзець цалкам.
– Поспехам «Энергетыка» і няўдачам мінскага «Дынама», нябось, дзівіліся?
– Насамрэч тое, што «студэнты» летась прайшлі чэмпіянат так роўна, прыемна ўразіла. Бо калі ўспомніць, то ў мінулыя гады было не так. Стартавалі магутна, але затым усё роўна здараліся спады, а то і правалы. Потым набіралі моц ізноў. А што сказаць пра «Дынама»…
Так, усё чакаюць ад каманды чэмпіёнства або дужання за яго. У Беларусі прызвычаіліся да таго, што традыцыйна клубы з добрымі бюджэтамі будуць у гонцы за медалямі вышэйшай пробы да апошняга тура. Як бачна, атрымліваецца не заўсёды. Хаця ўсё для «бела-блакітных» накшталт атрымлівалася, і яны павінны былі заваяваць тытул, але нешта пайшло не так.
– З боку сапраўды відаць, што якасць футбола асела?
– Чэмпіянат выраўняўся. За кошт таго, што, паводле беларускіх мерак, якасных легіянераў у краіне выступае ўсё менш. Цяпер іх будзе зусім няшмат. У асноўным склады каманд напаўняюцца беларускімі ігракамі. З аднаго боку, гэта вельмi добра. Але як такі ўзровень футбола, безумоўна, знізіўся, – сказаў Даўгяла.
