Унук Мустыгіна: «Шкада, не засталося сведчанняў гульні, якую паказваў кумір заўзятараў. Можа, хто-небудзь дапаможа адшукаць хоць 15 хвілін запісу»
Унук экс-футбаліста мінскага «Дынама» Міхаіла Мустыгіна Артур Мустыгін распавёў пра дарэмныя пошукі запісаў матчаў каманды з удзелам дзеда, якога не стала 27 студзеня на 86-м годзе жыцця.
Мустыгін з'яўляўся бронзавым прызёрам чэмпіянату СССР 1963 года і фіналістам Кубка СССР 1965 года, лепшым бамбардзірам чэмпіянатаў СССР 1962 і 1967 гадоў. У 1963 і 1967 Мустыгін уваходзіў у спісы 33 лепшых футбалістаў СССР.
За «бела-блакітных» ён згуляў 253 матчы і забіў 91 мяч. Некалькі гадоў быў капітанам каманды.
– Ён пражыў доўгае і цікавае жыццё. Многае паспеў расказаць і зрабіць.
Шкада толькі аднаго, што зусім не засталося сведчанняў той гульні, якую паказваў кумір дынамаўскіх заўзятараў 60-х. Ніякіх запісаў матча ні ў інтэрнэце, ні, відаць, у архівах Белрадыёкампаніі няма.
Прынамсі, я не знайшоў. Тыя ж фрагменты, а, бывае, і цэлыя гульні зборных СССР паступова з'яўляюцца ў тым жа YouTube. А вось гульняў мінскага «Дынама» таго часу, на жаль, няма. І маё жаданне падзеліцца ўспамінамі пра майго дзеда, Мустыгіна Міхаіла Міхайлавіча, у ліку іншага, выклікана яшчэ і крыху надзеі, што пасля прачытання хто-небудзь адгукнецца і дапаможа адшукаць хоць пятнаццаць хвілін запісу з удзелам таленавітага бамбардзіра.
Вось гэта, на мой погляд, быў бы найлепшы падарунак яго памяці, – сказаў Мустыгін-малодшы.
