Эрык тэн Хаг: «Каземіра і некалькі гульцоў перайшлі рысу, але пакаралі толькі яго»
Галоўны трэнер «Манчэстэр Юнайтэд» Эрык тэн Хаг пракаментаваў бойку падчас матчу супраць «Крыстал Пэлас» (2:1) у 22-м туры АПЛ.
«Каземіра перайшоў рысу, вы гэта бачылі. Аднак я незадаволены непаслядоўным судзействам. Не толькі ў сённяшнім матчы, але і ў папярэднім супраць «Крыстал Пэлас», калі Лісандра Марцінеса ўдарылі локцем.
Сёння многія перайшлі рысу, уключаючы некалькіх гульцоў «Крыстал Пэлас», але VAR не пераглядаў іх дзеянні. Таксама на мінулым тыдні ў кубкавым матчы супраць «Рэдынга» траўміравалі Крысціяна Эрыксена.
Я яшчэ раз прагледзеў відэа бойкі і ўбачыў, як супернік рызыкуе траўмаваць Антані, пасля чаго страсці закіпелі. Некалькі гульцоў удзельнічалі ў інцыдэнце, але пакаралі толькі Каземіра», – сказаў тэн Хаг.
Сёння Каземіра атрымаў першую прамую чырвоную картку ў кар'еры. Калі «Манчэстэр Юнайтэд» падасць апеляцыю, а Футбольная асацыяцыя Англіі адхіліць яе, то дыскваліфікацыя бразільскага паўабаронцы будзе падоўжаная да чатырох матчаў.
