Беларуская футбалістка Куніцкая – пра землятрус: «Толькі летась гуляла за «Хатайспор», была капітанам. Хто б падумаў, што так пашанцуе»

Беларуская футбалістка Анастасія Куніцкая, якая выступае ў Турцыі, распавяла, як перажыла землятрус, які адбыўся на паўднёвым усходзе краіны 6 лютага.

«За дзень да таго мы гулялі ў Самсуне, гэта самы поўнач, бераг Чорнага мора. І ў 4 раніцы вярнуліся ў Дэнізлі. Я толькі ўвайшла ў дом – і тут скаланула. Не моцна, я не паспела спалохацца. Тут жа адкрыла Інтэрнэт, і ўсё стала зразумела.

А толькі ў мінулым годзе я гуляла за «Хатайспор», была капітанам каманды, таму шмат маіх сяброў засталіся там без дамоў, горад практычна ўвесь разбураны. У Хатаі нас было чатыры беларускі: Юлія Дубень, Алеся Лынько, Анастасія Сідарчук і я. У 2022-м гулялі там. Потым мы з Юляй перайшлі ў «Кірэчбурну», потым я – у Дэнізлі, у першую лігу, Алеся перайшла ў «Аташэхір», а Насця Сідарчук засталася ў «Хатайспоры»... Але з-за экзаменаў ва ўніверсітэце цяпер не прыехала. Хто б падумаў, што нам так пашанцуе», – сказала спартсменка.