Лаціта і Маўрынью пасварыліся пасля матча «Ромы» і «Лацыа»
Галоўны трэнер «Ромы» Жазэ Маўрынью і прэзідэнт «Лацыа» Клаўдзіа Лаціта пасварыліся пасля ўчорашняга матча каманд у чэмпіянаце Італіі, паведамляе La Gazzetta dello Sport.
Усё пачалося з таго, што абаронца «арлоў» Алесі Раманьёлі пачаў святкаваць перамогу (1:0) перад раздзявальняй «ваўкоў», чым выклікаў рэзкую рэакцыю Джанлукі Манчыні, які па чутках назваў Раманьёлі «кавалкам лайна».
Лаціта спрабаваў разняць футбалістаў, да яго падышоў Маўрынью і сказаў: «На што ты глядзіш?».
«Я – прэзідэнт «Лацыа». А ты хто? Гэта мой дом, цябе тут не павінна быць», – адказаў Лаціта, намякаючы на дыскваліфікацыю 60-гадовага партугальца.
Тым не менш крыніцы ў «Роме», на якія спасылаецца газета, сцвярджаюць, што камісар Федэрацыі футбола Італіі дазволіў Маўрынью знаходзіцца ў раздзявальні пасля гульні.
