Парэчын пра белфутбол: «Галоўная праблема – умяшанне дзяржавы ў асобе міністэрства спорту і міністра Кавальчука»
Трэнер клуба «Сталь» (Польшча, Д4) Дзяніс Парэчын у інтэрв'ю тэлеграм-каналу «Людзі» падзяліўся меркаваннем пра АБФФ.
– Можна ацэньваць працу, зробленую добра ці дрэнна, а на дадзеным этапе я не бачу нічога. Да Базанава былі розныя старшыні: Рыгор Фёдараў, Генадзь Нявыглас… Людзі не са спорту, але працавалі прадуктыўна. Проста багі ў параўнанні з цяперашнімі кіраўнікамі. Я не пра вынікі зборнай – іх ніколі не было.
Але раней меў месца парадак, скажу так. Усё паважна і высакародна. Было імкненне зрабіць наш футбол лепшым, рабіліся крокі. Цяпер нейкая безнадзейнасць. Няма нават прасвету, што могуць быць змены ў лепшы бок.
Наогул галоўная праблема – умяшанне дзяржавы ў асобе міністэрства спорту і міністра Кавальчука. Футбол і ўвесь спорт знаходзяцца пад кантролем «старэйшага брата». Гэта толькі памнажае памылкі і глупства, – сказаў Парэчын.
