Пракуратура Нідэрландаў запытала 3,5 года турмы для гульца «Урала» Ганчарэнкі Улута, які п'яным ехаў 203 км/г і ўрэзаўся ў машыну, дзе загінула дзіця

Пракуратура Нідэрландаў запатрабавала пасадзіць на 3,5 гады турмы падапечнага Віктара Ганчарэнкі – нападаючага «Урала» Рая Улута.

У ноч з 13 на 14 лістапада 2021 года аўтамабіль, у якім знаходзіліся на той момант гулец «Хераклеса» Улут і яго знаёмы, урэзаўся ў машыну, у якой ехала сям'я – мужчына, жанчына і двое дзяцей. Найбольш пацярпеў 4-гадовы хлопчык, які ў выніку атрыманых траўм памёр у бальніцы.

Бартавы камп'ютар аўтамабіля футбаліста паказаў, што хуткасць руху склала 203 км/г. Тэст на наяўнасць алкаголю ў крыві паказаў 1,18 праміле, што больш як у два разы перавышае дапушчальную мяжу.

Апроч турэмнага тэрміна, пракурор таксама запытаў пазбаўленне правоў кіроўцы для форварда на 4 гады.

«Улут ехаў з хуткасцю 203 км/г, ён цалкам націснуў на газ, не спрабаваў затармазіць або выруліць. Язда на такой высокай хуткасці – свядомы выбар.

Падазроны зрабіў усё магчымае пасля аварыі, каб пазбегнуць пакарання», – сказаў пракурор, маючы на ўвазе ілжывыя паказанні Улута на допыце пасля аварыі.