Экс-прэзідэнт Федэрацыі футбола Італіі ў 2006 годзе заклікаў «не аддаваць перавагу «Ювентусу» і «дапамагаць «Лацыа»
У сетцы з'явіліся новыя запісы праслухоўванняў былога прэзідэнта Федэрацыі футбола Італіі Франка Карара.
Перад матчам чэмпіянату Італіі паміж «Ювентусам» і «Інтэрам» функцыянер звярнуўся да кіраўніка судзейскага камітэта Паола Бергама: «Калі ёсць сумневы, то не аддавайце перавагу «Ювентусу».
Паслухай, калі б судзіў П'ерлуіджы Каліна, то праблемы не было б, бо калі ён дапускае памылку, то ніхто нічога не кажа. Радамонці – арбітр з не вельмі добрай рэпутацыяй… Божа мой, калі Радамонці памыліцца супраць «Інтэра» – гэта будзе беспарадак».
Пасля гэтай размовы Бергама патэлефанаваў арбітру Паола Радамонці і даў таму такую параду: «Паміж «Ювентусам» і «Інтэрам» розніца ў 15 ачкоў. Павер мне, калі сумняваешся, то падумай пра каманду, якая знаходзіцца ніжэй».
Таксама праслухоўванні зафіксавалі ад Карара рэкамендацыю «дапамагаць «Лацыа»: «У нядзелю яны гуляюць з «Міланам». Аб'ектыўна – гэта складаны матч, мы павінны працягнуць ім руку дапамогі».
У 2006 годзе ў італьянскім футболе адбыўся карупцыйны скандал пад назвай «Кальчаполі», калі некалькі клубаў абвінавацілі ў супрацоўніцтве з арбітрамі і арганізацыі дагаворных матчаў. У выніку «Ювентус» апынуўся ў Серыі В і быў пазбаўлены двух чэмпіёнскіх тытулаў.
