Звальненне Кана і Саліхаміджыча можа паўплываць на будучыню ключавых гульцоў «Баварыі»
Звальненне генеральнага дырэктара Олівера Кана і спартыўнага дырэктара Хасана Саліхаміджыча з «Баварыі» можа мець сур'ёзныя наступствы для трансфернага рынку.
Гэтым летам у «Баварыі» адбудзецца шэраг змен, паведамляе Фабрыцыа Рамана. Па завяршэнні апошняга тура Бундэслігі стала вядома, што мюнхенскі клуб звольніў генеральнага дырэктара Олівера Кана і спартыўнага дырэктара Хасана Саліхаміджыча.
Паводле інфармацыі Рамана, «Баварыя» не плануе актываваць опцыю выкупу Жаау Канселу за 70 мільёнаў еўра. Па завяршэнні сезона партугалец вернецца ў «Манчэстэр Сіці». Дэйлі Блінд, які не згуляў ніводнага матчу пад кіраўніцтвам Томаса Тухеля, пакіне «Баварыю» на правах вольнага агента.
Перамовы па новым кантракце з Альфонса Дэвісам, якія да звальнення Кана і Саліхаміджыча знаходзіліся на прасунутай стадыі, зараз пачнуцца з чыстага ліста. «Рэал» і «Манчэстэр Сіці» сочаць за сітуацыяй вакол канадца.
Люка Эрнандэс, як і Дэвіс, некалькі дзён таму быў блізкі да падаўжэння кантракту, але зараз змена кіраўніцтва таксама можа паўплываць на яго будучыню ў клубе. «ПСЖ» зацікаўлены ў трансферы французскага абаронцы.
Таксама Рамана пацвердзіў, што нягледзячы на звальненне генеральнага і спартыўнага дырэктараў, «Баварыя» працягне будаваць праект на чале з Томасам Тухелем.
