ФІФА ўслед за УЕФА можа дазволіць зборным Расіі U-17 удзел у міжнародных турнірах

ФІФА разглядае адмену поўнай забароны для зборных Расіі на ўдзел у міжнародных турнірах, паведамляе Sky News.

Указана, што рашэнне можа быць прынятае сёння на пасяджэнні Савета ФІФА. У такім выпадку зборным Расіі U-17 дазволяць выступаць на чэмпіянаце свету, калі яны пройдуць кваліфікацыю. Раней такое рашэнне прыняла УЕФА, дазволіўшы мужчынскай і жаночай зборным Расіі U-17 удзельнічаць у чэмпіянатах Еўропы, але без сцяга і гімна.

ФІФА разглядае чэмпіянат Еўропы сярод юнакоў да 17 гадоў як дэ-факта адборачны турнір на чэмпіянат свету, што дае ім логіку для вяртання Расіі. На мужчынскі чэмпіянат свету U-17 Расія ўжо не зможа адабрацца. Ён адбудзецца ў лістападзе. Тэарэтычна расіянкі могуць прабіцца на аналагічны жаночы турнір, які адбудзецца ў наступным годзе.

Да гэтага ўсе расійскія клубы і зборныя былі адхіленыя ад міжнародных спаборніцтваў з-за агрэсіі супраць Украіны.