Школік пра кваліфікацыю ЛЧ: «Любы супернік мінскаму «Дынама» па сілах, усё ў нашых руках»
Расійскі паўабаронца мінскага «Дынама» Ігар Школік падзяліўся думкамі перад матчам з армянскім «Пюнікам», які пройдзе ў рамках 1-га кваліфікацыйнага раунда Лігі чэмпіёнаў.
Гульня адбудзецца 10 ліпеня на стадыёне «Гарадскі» ў Мезекевешдзе, Венгрыя. Пачатак – у 21:45 па беларускім часе.
Сустрэча ў адказ пройдзе 16/17 ліпеня ў Арменіі.
– Наступны супернік – армянскі «Пюнік». Разбіралі каманду? Што можаце сказаць пра яе?
– Відэа па іх цяжка дастаць. Яны зараз праводзяць зборы, гуляюць закрытыя матчы. Але ёсць агульная карціна і разуменне іх гульні. Бліжэй да матча будзем больш грунтоўна разбіраць іх.
– Як ацаніце шанцы на праход далей?
– Лічу, шанцы ў нас добрыя. Мы набралі выдатны ход. Можна сказаць, усё ў нашых руках.
– У выпадку поспеху, хутчэй за ўсё, у суперніках будзе балгарскі «Лудагорац». Ці па сілах ён?
– Любы супернік нам па сілах. Гэта двухматчавае супрацьстаянне, у якім можна прайсці кожную каманду, незалежна ад яе ўзроўню. Галоўнае, каб супалі: жаданне, поспех, каб была на ўзроўні і наша ўласная гульня.
– Як будзеце дабірацца да Мезекевешда?
– У мяне расійскае грамадзянства. Таму я асобна ад каманды палячу. Да Стамбула, а адтуль у Будапешт. Каманда ж будзе дабірацца на аўтобусе да Вільні, адтуль самалётам да Варшавы, далей за Будапешт і адтуль ужо зноў на аўтобусе да Мезекевешда, – сказаў Школік.
Нагадаем, што з сакавіка 2022-га ўсе клубы і зборныя Беларусі могуць праводзіць дамашнія матчы выключна на нейтральнай тэрыторыі і без гледачоў на трыбунах. Такое рашэнне прынятае з-за вайны ва Украіне, якую з 24 лютага 2022 года працягвае Расія з выкарыстаннем тэрыторыі Беларусі.
