Пушнякоў пра Суперкубак: «У такіх умовах вельмі цяжка гуляць: мы ж на вуліцу яшчэ не выходзілі, ніводнай трэніроўкі не правялі!»
Паўабаронца «Нёмана» Сяргей Пушнякоў падзяліўся меркаваннем пра матч з мінскім «Дынама» ў Суперкубку Беларусі, які завяршыўся перамогай сталічнага клуба з лікам 2:0.
– Наколькі важны для «Нёмана», які з'яўляецца дзейным уладальнікам трафея, кубкавы паядынак з «Дынама»?
– Не хацелася б, каб мае словы здаліся нейкім апраўданнем, але, на маю думку, Суперкубак – гэта больш выставачны паядынак. Тым больш у такіх умовах вельмі цяжка гуляць: мы ж на вуліцу яшчэ не выходзілі, ніводнай трэніроўкі не правялі! Магчыма, у тым ліку і з-за гэтага стартавыя хвіліны правялі не найлепшым чынам, падзадыхаліся.
– Задачы на сезон ужо агучаныя? Перамога і ў Кубку, і ў чэмпіянаце?
– Натуральна, мы хочам перамагаць у кожным матчы, і галоўная мэта – чэмпіёнства. Мы вельмі хочам парадаваць заўзятараў і выйграць чэмпіёнства, заваяваць кубак. Будзем ісці да гэтага, – сказаў Пушнякоў.
