Паўлаў пасля 3:1 з Паўночнай Македоніяй: «Вынік быў важны не ў першую чаргу»
Віталь Паўлаў пракаментаваў свой дэбютны матч на пасадзе галоўнага трэнера зборнай Беларусі U-21 з Паўночнай Македоніяй U-21 (3:1).
– Асноўная задача нашага збору – паглядзець пэўную колькасць рабят на тых ці іншых пазіцыях. Вынік быў важны не ў першую чаргу. Вельмі здорава, што перамаглі. Гэта, безумоўна, дадасць упэўненасці ў сабе. Перад гульнёй рабятам казаў, што трэба выходзіць і не баяцца, верыць у сябе і свае сілы. Добра выглядалі паўтара тайма. Супернік у канцоўцы крыху ўзяў гульню пад кантроль – і нам прыйшлося цяжкавата. Прапусцілі непатрэбны гол пасля памылкі ў сярэдзіне поля.
– Замена Аляксандра Французава была звязана з пашкоджаннем. Ужо вядома, наколькі яно сур'ёзнае?
– Пасля таго, як забіў пенальці, ён папрасіў замену. У яго нейкі цягліцавы спазм у задняй паверхні сцягна. Каб не рызыкаваць, зрабілі замену.
– У заяўцы не было Кірыла Гоманава. Ён зможа прыняць удзел у бліжэйшым матчы?
– Цяжка сказаць. У яго мікратраўма, крыху пабераглі яго. На апошняй трэніроўцы гулец спатыкнуўся, пашкодзіў галёнкаступ. Таму далі яму магчымасць аднавіцца, – сказаў Паўлаў.
