Сяргей Пушнякоў: «Калі я толькі пачынаў у вышэйшай лізе, маладых адразу кідалі «пад танкі»
32-гадовы паўабаронца «Нёмана» Сяргей Пушнякоў узгадаў свае першыя матчы ў вышэйшай лізе.
– Ці можаш ты ўспомніць свой першы матч у вышэйшай лізе?
– Я выйшаў на замену хвілін на 20. Здаецца, гэта было ў Салігорску. Тады «Мінск» быў зусім іншай камандай. Мы змагаліся за месцы ў верхняй частцы табліцы. Вельмі магутная канкурэнцыя была ў складзе. Калі ж казаць пра першы матч, які я правёў у стартавым складзе, то гэта была гульня супраць мінскага «Дынама».
Цяпер падыход да маладых гульцоў адрозніваецца, на мой погляд. Зараз цябе спачатку правераць у матчах з камандамі слабейшымі, перш чым выпускаць супраць лідараў. У нас жа, калі я толькі пачынаў гуляць у вышэйшай лізе, усё адрознівалася. Цябе адразу кідалі «пад танкі» і казалі: «Даказвай, выходзь на поле і гуляй». Ну а дзе было сябе паказваць, акрамя як у матчах з топамі? Не атрымалася – сядзеш на лаўку, некалькі матчаў сядзіш і чакаеш, пакуль табе зноў дадуць шанц.
Насамрэч, мне заўсёды хацелася гуляць менавіта ў вышцы. Калі я яшчэ быў у дублі «Мінска», то ў мяне была магчымасць з'ехаць у Расію. Мяне маладога ўзялі на зборы ў Турцыю. Там жа рыхтаваўся да сезона і піцерскі «Зеніт». Я згуляў пару матчаў за іх другую каманду, мне прапанавалі кантракт. Мяне ўсё вакол угаворвалі перайсці: сябры, бацька… Але я вельмі хацеў зайграць менавіта ў Беларусі.
Тады яшчэ і склад у «Мінска» быў такі, што шмат хто б пазайздросціў: Разін, Васілюк, Варанкоў. Калі ты, будучы юнаком, падаеш ім мячы і тут з'яўляецца шанц з імі разам гуляць, то гэта нібы ажыццяўленне мары, – распавёў Пушнякоў.
