Шагойка пасля перамогі над «Смаргонню»: «У першым тайме быў баявы футбол, апошнія пяць хвілін – гэта лыжка дзёгцю»
Галоўны трэнер «МЛ Віцебск» Аляксандр Шагойка пракаментаваў матч са «Смаргонню» (3:1) у 5-м туры вышэйшай лігі.
Пасля пяці тураў каманда ідзе на другім месцы з 13 ачкамі. Столькі ж балаў у лідэра турнірнай табліцы «Славіі».
– Напэўна, за выключэннем кампенсаванага часу матчу, ідэальная гульня ў вашым выкананні.
– Ну, ідэальнай яе не назавеш. Яна была добрай, як звычайна з некаторымі агрэхамі. Мы заўсёды жадаем большага. І апошнія пяць хвілін – гэта, канешне, лыжка дзёгцю.
– «Смаргонь» па матчы была бляклай. Чакалі ад суперніка такога цьмянага футбола?
– Не. Ды і не сказаў бы, што «Смаргонь» гуляла блякла. Першыя 20 хвілін у стартавым тайме быў баявы футбол, шмат барацьбы. Удзячны сваім хлопцам, што пасля такога эмацыйнага матчу з «Тарпеда-БелАЗ» у Кубку краіны, калі мы аддалі шмат сіл, яны выйшлі гатовыя, зараджаныя не саступіць у барацьбе, навязанай «Смаргонню».
– У дэбюце кожнага з таймаў ваша каманда забіла мяч. Была стаўка на бліцкрыг і перад гульнёй, і па выхадзе з раздзявалкі на другую палову?
– Не было ніякай стаўкі. Мы жадаем забіваць як мага больш, а як атрымліваецца…
– Калі коратка: як ацаніце старт чэмпіянату для сваёй каманды? Пасля пяці тураў «МЛ Віцебск» наверсе.
– Ну… Гэта добра.
– А што далей?
– Далей – больш. Будзем старацца перамагаць у кожным матчы. А там – як будзе, – сказаў Шагойка.
