Скрыпчанка пра нічыю ў 8-м туры: «Што «Іслач» стварыла з пункту гледжання галявых сітуацый?»
Галоўны трэнер мінскага «Дынама» Вадзім Скрыпчанка пракаментаваў нічыю з «Іслаччу» (2:2) у матчы 8-га тура вышэйшай лігі.
– Дынамічная гульня з забітымі галамі, са стварэннем галявых сітуацый. Было шмат магчымасцяў для таго, каб забіць больш, чым два мячы. Таму, каб не губляць ачкі ў такіх гульнях, у канцоўцы важна было рэалізоўваць тыя моманты, якія ў нас былі. А так, на апошніх секундах упускаць перамогу – гэта страта ачкоў для нас.
– Сілінскі правёў увесь матч, як ацаніце вы яго гульню? Ён даўно не гуляў, сёння ў старце.
– Добра выглядаў, дастаткова добра адпрацаваў у агульнакамандных дзеяннях, адборах. І па пазіцыі добра спрацаваў.
– У пачатку другога тайма «Іслач» перахапіла ініцыятыву, крышку «Дынама» падсела. З чым вы гэта звязваеце?
– «Дынама» не падсела.
– Стала ніжэй гуляць, менш валодаць мячом.
– Кантроль мяча – гэта ўсяго толькі кантроль мяча. Што «Іслач» стварыла з пункту гледжання галявых сітуацый?
– Пазнавата вы пачалі рабіць замены.
– Да 70-й хвіліны ўсё добра працавала. «Іслач» зрабіла трайную замену ў перапынку і затым выпускала новых рабят. Калі пяць свежых чалавек на футбольным полі знаходзяцца, зразумела, што за кошт свежасці каманда саперніка крыху ініцыятывай валодала з пункту гледжання адзінаборстваў, дзесьці і падбораў за кошт свежых футбалістаў, таму трэба было рэагаваць, – адзначыў Скрыпчанка.
