«Рэал» папрасіў «Ліверпуль» бясплатна адпусціць Трэнта Аляксандэра-Арнолда, каб ён змог згуляць за «сметанковых» на клубным чэмпіянаце свету, паведамляе The Telegraph.

Па даных крыніцы, прадстаўнікі мадрыдскага клуба кантактавалі з прадстаўнікамі «мерсісайдцаў» пасля таго, як 26-гадовы англійскі футбаліст абвясціў, што пакіне «Ліверпуль» пасля заканчэння сезона на правах вольнага агента.

Аднак «Рэал» толькі папрасіў, каб Трэнт далучыўся да іх датэрмінова, не робячы «Ліверпулю» фінансавых прапаноў на гэты конт.

У «Рэале» прапанавалі Аляксандэру-Арнолду адмовіцца ад заробку за чэрвень. Нягледзячы на гэта футбаліст не зможа пачаць выступаць за мадрыдскі клуб без згоды «Ліверпуля».

«Сметанковыя» спадзяюцца, што англійскі клуб дазволіць праваму абаронцу далучыцца да іх бясплатна да таго, як завершыцца тэрмін дзеяння кантракта Трэнта з «Ліверпулем».

Нагадаем, што тэрмін дзеяння пагаднення гульца з «мерсісайдцамі» заканчваецца 30 чэрвеня 2025 года.

З 15 чэрвеня па 13 ліпеня 2025 года ў ЗША адбудзецца клубны чэмпіянат свету, на якім згуляе «Рэал».

Мадрыдцы змогуць заявіць новых гульцоў на гэты турнір, калі завершаць іх падпісанне ў перыяд з 1 па 10 чэрвеня 2025 года.

Раней The Athletic паведамляў, што Аляксандэр-Арнолд падпіша кантракт з "Рэалам" на 6 гадоў.

Са спасылкай на іспанскія крыніцы мяркуецца, што «Рэал» гатовы прапанаваць ад 500 да 850 тысяч фунтаў стэрлінгаў за датэрміновае скасаванне кантракту «Ліверпуля» з Трэнтам. Але пакуль гэта не з'яўляецца часткай стратэгіі «Рэала».

У бягучым сезоне Аляксандэр-Арнолд згуляў 43 матчы, забіў 4 мячы і аддаў 7 асістаў. Падрабязная статыстыка тут.

Аўтар: cымон pушынскі

Крыніца: The Telegraph