Галоўны трэнер «Тотэнхэма» Эндж Пастэкоглу напярэдадні фінальнага матчу Лігі Еўропы з «Манчэстэр Юнайтэд» падчас прэс-канферэнцый адрэагаваў на артыкул пра сябе ў брытанскай газеце Evening Standard.

У аўторак, 20 траўня, брытанская газета апублікавала артыкул з загалоўкам: «Эндж Пастэкоглу балансуе паміж героем і клоунам, а яго спадчына ў «Тотэнхэме» залежыць ад фіналу Лігі Еўропы».

На прэс-канферэнцыі перад фінальным матчам Лігі Еўропы супраць «Манчэстэр Юнайтэд» журналіст гэтай газеты задаў трэнеру лонданцаў пытанне. У сваім адказе Пастэкоглу ўзгадаў гэтую публікацыю, заявіўшы, што ён не клоун.

– Калі заўтра вы пераможаце, гэты сезон увойдзе ў гісторыю клуба як адзін з найлепшых у сучасную эпоху. Але, наадварот, калі вы прайграеце, гэта можа запомніцца як адзін з найгоршых сезонаў у чэмпіянаце за апошнія гады. Я хацеў спытаць, ці ўсведамляеце вы, што балансуеце на грані паміж двума зусім рознымі відамі славы і гісторыі?

– Гэта залежыць ад вашага погляду, але я скажу адно: незалежна ад заўтрашняга дня, я не клоун і ніколі ім не буду.

Мяне сапраўды расчаравала, што вы выкарыстоўвалі такую тэрміналогію, каб апісаць чалавека, які на працягу 26 гадоў, без усялякіх прывілеяў, пракладваў сабе шлях да таго, каб узначаліць клуб у фінале еўрапейскага турніру.

Калі вы лічыце, што наша няўдача будзе азначаць, што я клоун, то я нават не ведаю, як адказаць на гэтае пытанне, – сказаў Пастэкоглу.

59-гадовы аўстралійскі трэнер узначальвае «шпор» з лета мінулага года.

Пасля 37 тураў АПЛ «Тотэнхэм» ідзе на 17-й пазіцыі ў турнірнай табліцы АПЛ.

Матч «Тотэнхэм» – «Манчэстэр Юнайтэд» адбудзецца заўтра, 21 траўня. Пачатак – у 22.00.

Аўтар: Dzmitry Antonau

Крыніца: Manchester Evening News