«Мы не вернемся ў «Барсу», а калі і вернемся – давядзецца выкінуць Лапорту». Брат Месі разнёс экс-клуб Леа

8 лютага ўвесь свет згадаў, што ў Ліянеля Месі ёсць брат Маціяс. Той у прамым эфіры на Twitch разнёс кіраўніцтва «Барселоны» і заявіў, што Леа не вернецца ў клуб, пакуль там Лапорта.

Відэа, дарэчы, ужо выдалена з платформы.

Што нагаварыў

Маціяс Месі прайшоўся па ўсіх – Лапорце, фанатах «Барсы», гісторыі клуба, дасталася нават Педры (а Гаві пахваліў).

• Пра вяртанне Леа ў «Барселону» і Лапорту: «У мяне ёсць выразка з газеты SPORT з загалоўкам «Месі павінен вярнуцца ў «Барсу» і я сказаў: «Хахахаха, мы не вернемся ў «Барселону». А нават калі і вернемся, нам давядзецца правесці добрую чыстку. Сярод іншага – давядзецца выкінуць Лапорту, няўдзячнага за ўсё тое, што Месі зрабіў для «Барселоны».

• Пра фанатаў: «Людзі яго (Месі – заўв.) не падтрымалі. Яны павінны былі выйсці на пратэст ці нешта падобнае. Хай бы Лапорта сышоў, а Месі застаўся. Іспанцы (у іншых варыянтах перакладу – каталонцы – заўв.) – здраднікі. Я кажу гэта вам, таму што я хачу, каб вы пачулі гэта ад нас, не ад кагосьці іншага. Мая мама аднойчы сказала Ліянелю, што яны яму аддзячаць, як Раналдзіньё».

• Пра гісторыю «Барсы»: «Ніхто не ведаў пра іх раней, толькі пра «Мадрыд». Любы, хто меў нагоду наведаць Барселону, мог зайсці ў музей – а там усё пра Месі. «Барселона» пачала быць вядомай дзякуючы Месі».

• Пра параўнанне Педры і Гаві: «Мне не падабаюцца абодва, але калі выбіраць, то абяру Гаві. Ён змагаецца з усімі, у любы момант пакідае каманду суперніка без аднаго гульца».

Ліянель Месі з-за журналістаў дыстанцаваўся ад заяў брата, Маціяс выбачыўся

Публічна Ліянель Месі яшчэ не каментаваў усе гэтыя заявы Маціяса. Але журналіст Relevo Тоні Хуанмарці паведаміў, што асяроддзе Месі адзначае, што словы Маціяса – яго асабістая думка. І яна «не павінна супадаць» з думкамі іншых блізкіх да Леа людзей, у тым ліку самога футбаліста. Падобнае прадстаўнікі Месі заявілі і ў каментарыі ESPN.

У «Барсе» журналісту паведамілі, што «здзіўленыя» заявамі Маціяса і адмовіліся каментаваць штосьці далей.

Маціяс ужо апублікаваў пост у інстаграме, у якім выбачыўся: «Я хачу папрасіць прабачэння за тое, што я сказаў на стрыме, я ўсяго толькі жартаваў са сваім сынам і сябрамі. Як я магу так думаць пра такі велічны клуб, як «Барселона», які даў так шмат маёй сям'і і Леа. Хачу папрасіць прабачэння ў кожнага, асабліва ва ўсіх фанатаў «Барселоны».

Фота: інстаграм Маціяса Месі, Norbert Scanella/Global Look Press