Месі забіў 700 мячоў у клубнай кар'еры: больш за ўсё пакутавала «Севілья», даўжэй за ўсё пратрымаўся «Чэлсі», двойчы засмучаў Гутара
Дзіўная статыстка.
У дэрбі з «Марселем» (3:0) Ліянэль Месі зноў нагадаў сябе самага найлепшага часу: аддаў дзве галявыя і вызначыўся голам. Забіўшы, Леа дасягнуў прыгожай лічбы ў 700 галоў у клубнай кар'еры. У кастрычніку такое ж дасягненне пакарылася Крышціяну Раналду, які адзначыўся тады ў матчы супраць «Эвертана». Пасля гэтага партугалец забіў толькі адзін мяч за «д'яблаў» у Лізе Еўропы, а затым паляцеў паляпшаць статыстыку ў Саудаўскую Аравію.
Месі ішоў да свайго рэкорду амаль 18 гадоў, з 1 мая 2005 года, калі аргенцінец паразіў вароты «Альбасетэ» ў чэмпіянаце Іспаніі. Пасля гэтага гулец пабіў мноства рэкордаў, стаўшы найлепшым бамбардзірам у гісторыі «Барселоны» (672 галы) і Ла Лігі (520).
Аргенцінец у Еўропе забіваў 46 розным клубам з 19 краін. У еўракубках ён не здолеў вызначыцца толькі ў варота чатырох каманд, супраць якіх гуляў: «Інтэра», «Удынезэ», «Рубіна» і «Атлетыка» (затое адарваўся на іх у Ла Лізе). Даўжэй за ўсё супраць Месі трымаўся лонданскі «Чэлсі» – 730 хвілін, але ў сезоне-2017/18 гулец такі вызначыўся галамі і ў матчах супраць «сініх».
У Еўропе ад Леа больш за ўсё нацярпеўся «Арсенал», варатароў якога ён засмучваў 9 разоў. А леверкузенскаму «Баеру» бамбардзір забіў 7 галоў за 270 хвілін.
У чэмпіянаце Іспаніі Месі забіваў 38 розным камандам, перасягнуўшы дасягненні Рауля і Адурыса, якія адзначаліся супраць 35 супернікаў. У сезоне-2011/12 ён забіў усім камандам у чэмпіянаце. Самай любімай для Леа застаецца «Севілья» – 38 галоў у 43 матчах. Калі дадаць яшчэ 20 асістаў, то севільцам супраць Леа лепш наогул ніколі не гуляць.
У 2021 годзе Месі пабіў рэкорд Пеле – 643 галы за адзін клуб. У гонар гэтага форвард «Барсы» адправіў усім галкіперам, якіх калісьці засмуціў, піва – па колькасці прапушчаных галоў. Усяго такіх было 160 брамнікаў, і сярод іх адзін беларус.
На групавым этапе Лігі чэмпіёнаў-2011/12 БАТЭ, тады яшчэ рэгулярны ўдзельнік восеньскай стадыі еўракубкаў, патрапіў у групу з «Барселонай». У Мінску на стадыёне «Дынама» Ліянэлю ўдалося двойчы засмуціць Аляксандра Гутара.
У эпізодзе з першым голам беларускі брамнік фактычна зрабіў Леа падарунак.
Другі раз Месі класна рэалізаваў перадачу Дані Алвеса, магутна прабіўшы пад перакладзіну.
Гутар, як атрымаў падарунак, павіншаваў аргенцінца з чарговым рэкордам і, відаць, выпіў за здароўе форварда: «Легендарнага футбаліста з вялікім дасягненнем! За Тваё здароўе @leomessi !🍺🍺!»
***
Падобна, што аргенцінец не плануе спыняцца, так што будзем чакаць новых рэкордаў ад гульца ПСЖ: 800 галоў за кар'еру (засталося 2), 700 галоў без пенальці (засталося 10), 300 асістаў на клубным узроўні (застаўся 1), 100 галоў за зборную Аргенціны (засталося 2)
Фота: Norbert Scanella/Global Look Press
